Shavkat Mirziyoyev Emomali Rahmon taklifiga binoan 14-sentabr kuni amaliy tashrif bilan Tojikistonga jo‘nab ketgandi. Davlat rahbari Dushanbega tashrifini Tojikiston prezidenti bilan uchrashuvdan boshladi.
Prezident matbuot xizmatining xabar qilishicha, Shavkat Mirziyoyevni Dushanbe aeroportida Tojikiston bosh vaziri Qohir Rasulzoda va boshqa rasmiy shaxslar kutib oldi.
Shundan so‘ng O‘zbekiston yetakchisi Tojikiston prezidenti bilan muzokara o‘tkazdi.
Qayd etilishicha, muzokaralarda O‘zbekiston bilan Tojikiston o‘rtasidagi strategik sheriklik va ittifoqchilik munosabatlarini yanada mustahkamlashning dolzarb masalalari muhokama qilindi.
Oliy darajadagi kelishuvlar ijrosining amaliy jihatlariga, eng avvalo, iqtisodiyotning ustuvor tarmoqlarida kooperatsiya loyihalarini ilgari surish va madaniy-gumanitar almashinuv dasturini kengaytirishga alohida eʼtibor qaratildi. Bu borada qo‘shma Hukumatlararo komissiya samarali faoliyat olib borayotgani mamnuniyat bilan qayd etildi.
Uchrashuvda davlat rahbarlari Markaziy Osiyo mamlakatlari yetakchilarining navbatdagi Maslahat uchrashuvi va Orolni qutqarish xalqaro jamg‘armasi sammiti kun tartibiga kiritilgan masalalar yuzasidan ham fikr almashgan. Mintaqaviy hamkorlikning boshqa jihatlari ham ko‘rib chiqilgan.
Tashrif dasturiga muvofiq Dushanbeda Markaziy Osiyo mamlakatlari yetakchilarining navbatdagi Maslahat uchrashuvi va Orolni qutqarish xalqaro jamg‘armasi taʼsischi davlatlari rahbarlarining yig‘ilishi bo‘lib o‘tadi.
Bu sammitlarda prezident qator muhim va dolzarb taklif hamda tashabbuslarni ilgari surishi, mintaqada savdo-iqtisodiy, transport-logistika aloqalarini, “yashil” iqtisodiyot va energetika, suv va ekologiya sohalarida hamkorlikni yanada mustahkamlash, iqlim o‘zgarishlarining salbiy oqibatlariga qarshi birgalikda kurashish kabi masalalar yuzasidan o‘z nuqtayi nazarini bayon qilishi kutilmoqda.
Izoh (0)