Ijtimoiy tarmoqlarda Farg‘ona viloyatining Marg‘ilon shahrida bir yigit qizni majburlab mashinaga solib, olib ketmoqchi bo‘lgani aks etgan video tarqalgan edi. Viloyat IIB bergan maʼlumotga ko‘ra, voqea avvaldan tanishi bo‘lgan qiz va yigit o‘rtasida kelib chiqqan kelishmovchilik natijasida yuz bergan.
Viloyat IIB axborot xizmati rahbari Ismoiljon Sharipovning “Daryo”ga maʼlum qilishicha holat yuzasidan Marg‘ilon shahar IIB tomonidan maʼmuriy tartibda hujjatlar rasmiylashtirilgan.
“Yigitga nisbatan Maʼmuriy javobgarlik to‘g‘risidagi kodeksning 183-moddasi (mayda bezorilik) bilan hujjatlar rasmiylashtirildi” — dedi Ismoiljon Sharipov.
Maʼlumot uchun, mayda bezorilik, yaʼni jamoat joylarida uyatli so‘zlar bilan so‘kinish, fuqarolarga haqoratomuz shilqimlik qilish hamda jamoat tartibini va fuqarolarning osoyishtaligini buzuvchi shu kabi boshqa xatti-harakatlarda ifodalangan jamiyatda yurish-turish qoidalarini qasddan mensimaslik — bazaviy hisoblash miqdorining uch baravari (930 ming so‘m) dan besh baravari (1 million 650 ming so‘m) gacha jarima solishga yoki o‘n besh sutkagacha muddatga maʼmuriy qamoqqa olishga sabab bo‘ladi.
Izoh (0)