Yer aholisi har 437 yilda bir uchadigan kometani ko‘rishi mumkin bo‘ladi

Shimoliy yarimshar aholisi 2023-yil avgust oyida aniqlangan Nishimura kometasi uchishini ko‘rishi mumkin. Bu haqda The Guardian xabar berdi.

Nishimura kometasi 17-sentabr kuni Quyoshga eng yaqin masofaga yaqinlashadi va undan 33 million kilometr uzoqlikda bo‘ladi. Shundan so‘ng u Yerdan 125 million kilometr masofada uchib o‘tadi.

“Kometalar kashf etilgandan so‘ng ularni darhol ko‘rish imkoniyati juda kam hollarda uchraydi. Ularning aksariyati bir oyda, hattoki yillar o‘tib Quyoshga yaqinlashgan payt aniqlanadi”, — dedi Parij rasadxonasi astrofizigi Nikolay Biver.

Olimlarning qayd etishicha, qulay ob-havo sharoitida osmon jismini texnikalarsiz oddiy ko‘z bilan ko‘rish mumkin. Kometani “yashil dumi” orqali aniqlash mumkin, u changdan ko‘ra ko‘proq gazni o‘z ichiga olgani sababli shunday rangda bo‘ladi.

“Eng yaxshisi quyosh chiqishidan oldin Veneraning shimoli-sharqiy yo‘nalishda osmonga qarashdir”, — dedi Biver.

Ilmiy ravishda C/2023 P1 nomini olgan Nishimura kometasi 11-avgust kuni kashf etilib, uni aniqlagan yapon astronomi Xideo Nishimura sharafiga nomlangan.

Keyingi safar Yer aholisi kometani faqat 437 yildan ko‘proq vaqt ichida ko‘ra olishi ta’kidlanmoqda.