Sog‘liqni saqlash vazirligining maʼlum qilishicha, xususiy tibbiyot tashkilotlari 2023-yilda 2017-yilga nisbatan 2,7 barobarga ko‘payib, ularning soni 3 ming 200 tadan 8 ming 560 taga yetgan.
Qo‘shimcha qilinishicha, xususiy tibbiyot tashkilotlarida 2017-yilda 50 turdagi ixtisoslik bo‘yicha xizmat ko‘rsatilgan bo‘lsa, 2022-yilda esa 126 turdagi ixtisoslik bo‘yicha tibbiy xizmat ko‘rsatish yo‘lga qo‘yilgan.
Xususiy tibbiyot muassasasini ochish uchun yaratilgan sharoitlar va bu bemor hamda mahalliy shifokor kadrlar uchun qanday imkoniyatlar berishi haqida “Daryo” muxbiri “Ko‘z nuri” klinikalar tarmog‘i bosh shifokori Hikmatullo Sodiqov bilan suhbatlashdi.
Yutug‘imiz – shu soha egasimiz
Biz ko‘z kasalliklarini davolash yo‘nalishida ishlaymiz. O‘zim ko‘z shifokoriman – ko‘z kasalliklari bo‘yicha jarrohlik amaliyotlarini o‘tkazaman. Samarqanddagi davlat tibbiyot muassasasida to‘rt yil ishlaganman. Undan keyin to‘qqiz yil xususiy tibbiyot klinikasida oddiy shifokor sifatida ishladim. Shu vaqt mobaynida barcha shifokorlar singari o‘zimni ham shaxsiy klinikam bo‘lishini niyat qilib yurardim.
Bir necha yillar avval “Ko‘z nuri” klinikasiga asos soldik. Albatta, klinika ochib, uni yo‘lga solish uchun ancha vaqt va mablag‘, mehnat resursi kerak bo‘ladi. Bunda bizning yutug‘imiz — 10 yildan ortiq mana shu yo‘nalish bo‘yicha ish tajribasiga ega bo‘lganim, ko‘z kasalliklari bo‘yicha ichki muammolarni bilishim shifoxonamizning tezroq yurib ketishiga imkon berdi.
Ayni vaqtda klinikamizning Toshkent shahrida 1 ta, Samarqand viloyatida 2 ta va Qashqadaryo viloyatida bitta filiali faoliyat yuritmoqda. Bundan tashqari, boshqa viloyatlarga ham borib, tibbiy ko‘riklar va operatsiyalar o‘tkazib turamiz. Shifoxonalarimizda yuzdan ortiq xodimlar xizmat ko‘rsatmoqda.
Ortiqcha tekshiruvlar yo‘q
Bir narsani tan olib aytish kerak, haqiqatan ham prezidentimiz tadbirkorlarga katta eʼtibor qaratyaptilar. Qaysidir ishni qilishga ko‘zingiz yetsa, to‘g‘ri tashkil qilib va qonuniy ishlasangiz, istalgan yo‘nalishda yo‘llar ochib qo‘yilgan.
Biz kelgusida nafaqat yurtimiz, balki qo‘shni respublikalarda ham o‘z filiallarimizni ochmoqchimiz. Bu bo‘yicha ishlarni boshlaganmiz, yaʼni o‘sha mamlakatlar bozorini o‘rganyapmiz. Ularda bizchalik tadbirkorlarga yo‘l ochiq emasligiga guvoh bo‘ldik. Masalan, bizda hujjatlarni to‘g‘ri shakllantirib borsangiz na litsenziyalashda, na boshqa tartiblarda muammo bo‘lmaydi. Hech kimga iltimos qilishingiz yo birovga pul berishingiz shart emas.
Avvallari haqiqatan ham muammolar ko‘p bo‘lardi. Ayniqsa, ortiqcha tekshiruvlar ham vaqtingizni olardi, ham ishga xalal berardi. Hozir 5 yilda bir marotaba to‘liq tekshiruvdan o‘tasiz. Ungacha agar qonunchilik talablarini buzmasdan ishlasangiz, soliq organlari ham, Sog‘liqni saqlash vazirligi yoki boshqa tekshiruv organlari bezovta qilmaydi.
Hamma uchun foydali
Tabiiyki, bozorda qancha ko‘p taklif bo‘lsa, narxlarni o‘z-o‘zidan tushishiga olib keladi. Masalan, qo‘shni mamlakatlar bilan solishtirganda bizning yo‘nalishda xizmat ko‘rsatish narxi ancha arzon. Bu odamlarning puli kamligidan emas, balki xususiy klinikalarning ko‘pligidan, raqobat borligidan dalolat beradi. Aytaylik, biz qilayotgan baʼzi operatsiyalar qo‘ni mamlakatlarda ikki-uch baravar qimmat turadi. Shuning uchun ulardan bizga kelib davolanuvchilar ko‘p.
Xususiy klinikalarning ko‘p bo‘lishi shifokorlar ish bilan taʼminlaydi. Bundan tashqari, O‘zbekistonda tajribali kadrlarning qolishiga ham yordam bermoqda. Boisi avvallari ko‘pchilik tajribali shifokorlarning chet mamlakatlarga ketishi ko‘p kuzatilar edi. Masalan, Afrika mamlakatlariga, Rossiya va Yamanga ketib qolishardi. Endilikda o‘zimiz chet eldan tajribali shifokorlarni chaqirtirib ishlatyapmiz.
Yana bir jihati, noyob uskunalarning o‘zimizda bo‘lishi bemorlarni chet elga borib davolanishiga hojat qoldirmaydi. Shu bois oftalmologik kasalliklar bo‘yicha bemorlarni boshqa davlatga borib davolanish karrasiga kamaydi.
Bozor katta
Hozir qaysi klinikaga borsangiz, bemorlar navbatda turganiga guvoh bo‘lasiz. Bu bozorda talab borligidan dalolat beradi. Demak, tibbiyot yo‘nalishida ish boshlamoqchi bo‘lgan tadbirkorlar qo‘rqmasdan ish boshlasa bo‘ladi. Yaxshi jamoa — malakali mutaxassislar, tajribali ish yurituvchilar jamlansa kifoya, boshqa tarafdan esa hamma sharoitlar yetarli.
Maʼlumot uchun, xususiy tibbiyotni qo‘llab-quvvatlash tizimi yo‘lga qo‘yildi. Misol uchun, bugungi kunda nodavlat tibbiyot tashkilotlari tomonidan 2025-yil 1-yanvarga qadar qator imtiyozlar berilgan. Jumladan:
- o‘z ehtiyojlari uchun respublika hududiga olib kiriladigan yangi tez tibbiy yordam avtomobillari import bojxona bojidan ozod qilingan;
- olib kelinadigan yangi tibbiy asbob–uskunalar, butlovchi buyumlar va ularning ehtiyot qismlari hamda sarflash materiallari uchun bojxona imtiyozlari mavjud;
- sarflash materiallarini O‘zbekiston Respublikasi hududiga olib kirishda qo‘shilgan qiymat solig‘idan ozod qilindi;
- xususiy tibbiyot muassasalari barcha soliq to‘lovlaridan ozod qilingan.
Izoh (0)