Buxoro viloyatining Buxoro shahridagi ko‘p qavatli uy qurilishida ishlayotgan fuqarolar avtokran ilgagidagi bunkerdan yiqilib tushishi oqibatida vafot etdi. Bu haqda xabar bergan “Daryo” manbasiga ko‘ra, voqea 2023-yilning 5-sentabr kuni sodir bo‘lgan.
Viloyat prokuraturasi axborot xizmati rahbari Bekzod Sharipovning “Daryo”ga qo‘shimcha qilishicha, avtokran bunkeridan yiqilib tushganlar ikki kishi bo‘lgan.
2023-yilning 5-sentabr kuni Buxoro shahar IIO FMB 102 navbatchilik qismiga soat 17:57 da Absolute Elite Building MCHJga tegishli bo‘lgan Buxoro shahar “Nizomiy Ganjaviy” MFY hududida qurilayotgan ko‘p qavatli uyning qurilishida ikki nafar yollanma ishchi tan jarohati olganligi to‘g‘risida xabar kelib tushgan. Xabarga asosan Buxoro shahar IIO FMB TB tezkor-tergov guruhi tomonidan hodisa sodir bo‘lgan joy ko‘zdan kechirilgan, — deydi Bekzod Sharipov.
Dastlabki to‘plangan hujjatlarga ko‘ra, ko‘p qavatli uy qurilishida yollanma ishchi sifatida ishlab kelgan fuqarolar — qashqadaryolik A.I. hamda N.Q. bo‘lgan.
Yuk ko‘tarish uchun mo‘ljallangan avtokranning ilgagiga osilgan bunkerga kirib binoning 8-qavati fasad qismini suvayotgan 21 yoshli fuqarolar avtokran bunkeri bino devoriga tegib, ilgaklari uzilishi natijasida yerga yiqilib, og‘ir tan jarohati olgan. Ular Respublika shoshilinch tez yordam ilmiy markazi Buxoro filialining qayta joylantirish bo‘limida vafot etgan, — deydi Bekzod Sharipov.
Izoh (0)