G20 yetakchilari Nyu-Dehlidagi sammitda qo‘shma deklaratsiya bo‘yicha konsensusga erishdilar. Unda Ukraina ham tilga olindi. Bu haqda The Guardian xabar berdi.
Hindiston bosh vaziri Narendra Modi bu bo‘yicha bayonot berdi. U G20 blok oldida turgan masalalar, xususan, Ukrainadagi urush masalasi bo‘yicha konsensus deklaratsiyasini qabul qilganini aytdi.
“Barcha jamoalarning mashaqqatli mehnati tufayli biz G20 yetakchilari sammiti deklaratsiyasi bo‘yicha konsensusga erishdik. Men ushbu deklaratsiya qabul qilinganini e’lon qilaman”, — dedi Modi.
Bungacha ommaviy axborot vositalari G20 davlatlari o‘rtasida qo‘shma kommyunike bo‘yicha kelishmovchiliklar yuzaga kelgani, xususan, G‘arb davlatlari Rossiyaning Ukrainaga qarshi urushini qoralashni talab qilgani, biroq Moskva buni blokirovkalagani haqida xabar berdi.
Bloomberg 10-sentabr ertalab G20 diplomatlari Ukrainadagi urush bo‘yicha til topishga kelishib olgani haqida xabar berdi. Bu rahbarlarga umumiy deklaratsiyani qabul qilish imkoniyatini berdi.
Deklaratsiya tafsilotlari
G20 sammitining yakuniy deklaratsiyasi matnidagi asosiy tezislar quyidagilar:
- G20 barcha davlatlarni xalqaro huquq tamoyillariga rioya qilishga, hududiy yaxlitlik va suverenitetni, xalqaro gumanitar huquqni hurmat qilishga chaqirdi;
- Konfliktlarni tinch yo‘l bilan hal qilish, diplomatiya va muloqot hal qiluvchi ahamiyatga ega;
- G20 Ukrainada BMT Nizomining barcha maqsad va tamoyillariga javob beradigan keng qamrovli, adolatli va mustahkam tinchlikni qo‘llab-quvvatlashga qaratilgan barcha konstruktiv tashabbuslarni qo‘llab-quvvatlashga tayyor;
- Davlat rahbarlari Ukraina va Rossiyada oziq-ovqat va o‘g‘itlar yetkazib berishni taʼminlash bo‘yicha “don kelishuvi”ni to‘liq amalga oshirishga chaqirdi;
- G20 yadro qurolidan foydalanishga va unga bog‘liq tahdidlarga qarshi chiqdi.
Izoh (0)