Samarqand viloyati Bolalar ko‘p tarmoqli tibbiyot markazi bosh shifokori M.Azizov tomonidan “Dok-1 Maks”ning zaharli ekani haqida ogohlantirilgan, ammo bunga javoban hech qanday chora ko‘rmagani aytilayotgan viloyat sog‘liqni saqlash boshqarmasi boshlig‘i D.J.ga nisbatan qamoqqa olish ehtiyot chorasi qo‘llanilgan. Bu haqda “Dok-1 Maks” ishi bo‘yicha navbatdagi sud majlisida raislik etuvchi Muso Yusupov ma’lum qildi, deya xabar berdi “Daryo” muxbiri.
Qayd etilishicha, bu ma’lumot sud ishiga raislik qiluvchi Muso Yusupov tomonidan sudlanuvchilardan birining zaharli sirop haqida jamoatchilikni xabardor qilgan samarqandlik shifokorlarni, mas’ullarni sudga chaqirish haqidagi iltimosnomasiga javoban yangragan.
Siz suddagi ko‘rsatuvlaringizda Samarqand viloyati Bolalar ko‘p tarmoqli tibbiyot markazi bosh shifokori hamda viloyat sog‘liqni saqlash boshqarmasi mas’ullarini sudga chaqirish haqida iltimosnomalar ham kiritib o‘tdingiz. Sizga bu iltimosnomalarni alohida tartibda sudga taqdim qilishingiz kerakligini eslatib o‘taman. Yana shuni qo‘shimcha qilmoqchimanki, Samarqand viloyati sog‘liqni saqlash boshqarmasi boshlig‘iga nisbatan bu bo‘yicha qamoqqa olish tarzidagi ehtiyot chorasi qo‘llanilgan. Qo‘shimcha jinoyat ishi qo‘zg‘atilib, tergov harakatlari olib borilmoqda, — dedi sudya.
2022-yilning dekabr oyida ijtimoiy tarmoqlarda Samarqand shahridagi dorixonalardan xarid qilingan “Dok-1 Maks” tabletka va sirop dori vositalarini qabul qilgandan so‘ng bemorlarda turli nojo‘ya ta’sirlar kuzatilgani haqida xabarlar tarqalgandi. Tarmoqlarda tarqalgan mazkur xatda Samarqand viloyati Bolalar ko‘p tarmoqli tibbiyot markazi bosh vrachi oxirgi ikki oyda 21 kishi shu dori vositasi qabulidan so‘ng shikoyat qilgani, 17 nafar bolaning ahvoli o‘ta og‘ir bo‘lib, ularning 15 nafarida o‘lim holati kuzatilganini ma’lum qilgandi. Bosh shifokorning bu ma’lumotlari rasmiy xat sifatida 2022-yilning 15-dekabr kuni 416-raqam bilan viloyat sog‘liqni saqlash boshqarmasi boshlig‘i D.H.Jumaniyozovga yuborilgan.
Izoh (0)