BMT bosh kotibi Antoniu Guterrish Rossiya tashqi ishlar vaziri Sergey Lavrovga maxfiy maktub yozib, unda Rossiya uchun muhim imtiyozlar bilan don bitimiga qaytishni taklif qildi. Bu haqda Germaniyaning Bild nashri xabar berdi.
Taklif Rossiyaga qarshi sanksiyalarni sezilarli darajada yengillashtiradigan to‘rt banddan iborat ekani aytiladi. Gutterish SWIFT’dan uzilgan Rossiya Qishloq xo‘jaligi bankiga qarshi Yevropa Ittifoqining moliyaviy sanksiyalarini bekor qilishni taklif qilmoqda. Buning uchun Rossiya bankining RSHB Capital S.A deb nomlangan maxsus tashkil etilgan sho‘ba korxonasidan foydalanish va uni SWIFT tizimiga ulash taklif etiladi.
Ikkinchi punkt: Qora va Azov dengizlarida Ukrainaning ehtimoliy hujumlaridan don eksport qiladigan Rossiya kemalarini sug‘urtalash.
“Rossiyaning oziq-ovqat va o‘g‘it eksportini BMT tomonidan qo‘llab-quvvatlovchi Lloyd’s sug‘urta kompaniyasi 4-6 hafta ichida ishga tushishi mumkin”, — deyiladi xabarda.
Guterrish nafaqat “Rossiya oziq-ovqat va o‘g‘itlar eksporti uchun yuk sug‘urtasi”, balki kasko sug‘urta va P&I ni ham taklif qiladi.
Kasko sug‘urta — yuk tashiydigan kemalar uchun sug‘urta, P&I esa uchinchi shaxslarga yetkazilgan zarar uchun to‘liq javobgarlik sug‘urtasi.
BMT bosh kotibining uchinchi taklifi — Rossiya o‘g‘it ishlab chiqaruvchilarining Yevropadagi hisoblarini blokdan chiqarish. Maktubda bu masala tegishli davlatlar va Yevropa Ittifoqi rahbariyati bilan muhokama qilinishi qayd etilgan.
To‘rtinchi punkt — “tezkor port ruxsatnomalari orqali Yevropa Ittifoqi portlariga oziq-ovqat va o‘g‘itlarni tashiydigan Rossiya kemalarining samarali kirishini” ta’minlash.
“BMT qishloq xo‘jaligi savdosi bilan bog‘liq bo‘lgan Rossiya kemalarining Yevropa Ittifoqi portlariga kirishini osonlashtirishning keyingi variantlarini, shu jumladan, Rossiya portlarini tark etishdan oldin tegishli ruxsatnomalarni berishning soddalashtirilgan tartiblarini o‘rganishga tayyor”, — deyiladi maktubda.
Taʼkidlanishicha, shu maqsadda Guterrishning BMTdagi vakillari allaqachon Yevropa komissiyasi hamda Germaniya, Belgiya, Ispaniya hamda Niderlandiya bilan muzokaralar olib borgan.
Izoh (0)