Yaponiya aerokosmik tadqiqotlar agentligi (JAXA) tomonidan ishlab chiqilgan birinchi SLIM Oyga qo‘nish apparati koinotga uchirildi. Raketa-tashuvchi Kagosima prefekturasi janubidagi Tanegasima kosmik markazidan 7-sentabr kuni mahalliy vaqt bilan soat 08:42 da (Toshkent vaqti bilan 04:42) uchdi. Parvoz ob-havo sharoiti tufayli bir necha bor qoldirilgandi.
Modulning Yer tabiiy yo‘ldoshi yuzasiga qo‘nishi uchirilgan paytdan boshlab 4-6 oy ichida amalga oshishi kutilmoqda. Missiya doirasida zond kaft o‘lchamidagi vezdexod (istalgan joyda yura oladigan texnika) va multispektral kamera yordamida hozirgacha kam o‘rganilgan Oy mantiyasining tarkibini tahlil qiladi.
Qurilmani ishlab chiqishda qo‘llanadigan texnologiyalar ma’lum bir joyga 100 metrdan ortiq bo‘lmagan xato bilan qo‘nish imkonini beradi. AFP agentligining qayd etishicha, Oyga avvalgi qo‘nishlarda bu ko‘rsatkich bir necha kilometrga yetgan. “Insoniyat nafaqat oson bo‘lgan joyga, balki endi o‘zi xohlagan joyga qo‘na oladi”, deya ta’kidlagan JAXA parvozdan oldin.
Hindiston apparatining Oyga muvaffaqiyatli qo‘nishi
Ikki hafta oldin Hindiston kosmik kemasi “Chandrayaan-3” missiyasi doirasida Oy yuzasiga muvaffaqiyatli qo‘ngandi. Hindiston Yer tabiiy yo‘ldoshi yuzasiga kosmik kemani qo‘ndirgan to‘rtinchi davlatga aylandi. Avval Sovet Ittifoqi, AQSH va Xitoy bunga erishgan. Shu bilan birga Rossiyaning “Luna-25” stansiyasi avgust oyi oxirida Oyga qo‘nmoqchi bo‘lgan vaqtda halokatga uchragadi.
Izoh (0)