Ko‘plab xit taronalar ijrosi bilan muxlislar qalbidan joy olgan xonanda Lola 4-sentabr kuni 38 yoshni qarshi oldi. U kuylashdan tashqari o‘zbek tomoshabinlariga sevimli bo‘lishga ulgurgan “Sevinch”, “Kelgindi kuyov”, “Yondiradi, kuydiradi”, “Farhod va Shirin” kabi kinofilmlarda ham suratga tushgan.
Otasi san’atga qiziqish uyg‘otgan
Lola Yo‘ldosheva 1985-yilning 4-sentabrida Toshkent shahrida tug‘ilgan. Uning otasi Ravshanbek Yo‘ldoshev uzoq yillar mobaynida ichki ishlar organlarida tergovchi sifatida faoliyat yuritgan. Shu bilan birga, uning san’atga qiziqishi baland bo‘lgan. Aynan shu qiziqish ortidan Ravshanbek Yo‘ldoshev keyinchalik ko‘plab yulduzlarni kashf qilgan “Tarona rekords” prodyuserlik kompaniyasiga asos solgan. Lola oilada to‘rt nafar farzandning to‘ng‘ichi bo‘lgan, ya’ni xonandaning Rustam ismli ukasi va Anora, Asal ismli singillari bor.
Xonanda yoshligida gumanitar fanlarni katta qiziqish bilan o‘rganadi va Buyuk Britaniyadagi o‘rta maktabda tahsil oladi. Lola maktabni bitirganidan keyin Moskva xalqaro universitetida o‘qishga kiradi. Xonanda o‘qishni bitirgach, Toshkentga qaytadi va biznes sohasidagi bilimlarini mustahkamlash maqsadida poytaxtdagi Vestminster xalqaro universitetida o‘qiydi. So‘ngra Toshkent davlat yuridik universitetiga o‘qishini ko‘chiradi va oliy ma’lumotli yurist sifatida o‘qishni bitiradi.
Ijodiy faoliyatini reklama roligidan boshlagan
Lola o‘z ijodiy faoliyatini juda erta boshlagan. U o‘n yoshida “Shiribom” reklama roligi uchun o‘zining ilk taronasini ijro etgan. Lola 2002-yilda xonanda sifatida faoliyatini boshlaydi va “Netayin” nomli taronasini ijro etadi. Xonandaning ushbu taronasi ko‘p muddat xit taronalar safidan tushmaydi. U 2002-yilda rossiyalik prodyuserlar bilan shartnoma imzolaydi va bir muddat Mayya taxallusi ostida ijod qiladi.
Shundan keyin o‘zini aktrisalikda sinab ko‘rmoqchi bo‘lgan Lola 2003-yilda “Sevinch” nomli kinokartinada xonanda Shahzoda, aktyor Bobur Yo‘ldoshev bilan suratga tushadi va aktrisa sifatida taniladi. U shundan so‘ng “Muhabbatim”, “Topdim baxtimni”, “Imkon ber”, “Senga”, “Sog‘indim”, “Kel” taronasini muxlislariga taqdim etadi.
Xonanda ishtirokidagi “Kelgindi kuyov”, “Jodugar”, “Yondiradi, kuydiradi”, “G‘aroyib orzular” filmlari ham tomoshabinlarning e’tirofiga sazovor bo‘lgan.
Lola 2020-yilda Xitoy nashri tuzgan Markaziy Osiyoning eng go‘zal xonandalari ro‘yxatiga kiritilgan. Ushbu ro‘yxatdan ikki mashhur xonanda — Shahzoda va Rayhon ham joy olgan. Shuningdek, ro‘yxatda Qozog‘iston, Qirg‘iziston va Tojikistonning eng mashhur qo‘shiqchilari nomlari keltirilgan.
Omadsiz birinchi turmush
Aktrisa 2005-yilda “Tarona” mukofotlash marosimida “Yilning eng yaxshi ayol xonandasi” sifatida g‘olib deb topiladi. Shundan keyin xonanda turmushga chiqadi va ijodda tanaffus qilib, butun e’tiborini oilasiga qaratadi. Lola “Topdim baxtimni” nomli taronasida birinchi turmush o‘rtog‘i bilan suratga tushgan. Oradan 6 yil o‘tib, 2011-yilda u turmush o‘rtog‘i bilan ajrashganini va ijodga qaytganini ma’lum qiladi.
Lola birinchi turmush o‘rtog‘i bilan sevishib turmush qurgani, biroq keyinchalik u tomondan qo‘yilgan turli taqiq va cheklovlar o‘zaro kelishmovchilik hamda oilaning buzilishiga sabab bo‘lgani haqida so‘zlab bergandi.
“Biz sobiq turmush o‘rtog‘im bilan tanishganimizda 18 yoshda edim. U meni turmushga chiqishga ko‘ndirish uchun bir yil ‘mehnat qildi’, bizning to‘yimizga tish-tirnog‘i bilan qarshi bo‘lgan ota-onamni ko‘ndirish uchun esa yana bir yil sarfladi. U hammamizni ko‘ndirish uchun barcha mahoratini ishga soldi. Shu tarzda oradan 2 yil o‘tib biz unga taslim bo‘ldik. Otam sobiq turmush o‘rtog‘imdan to‘ydan keyin o‘qishimni davom ettirishim hamda o‘tgan yillar mobaynida erishgan karyeramni davom ettirish va’dasini oldi. Erkaklar qo‘l tashlashdi, non sindirildi, to‘yimiz bo‘ldi.
Ota-onamnikiga bir haftada bir marta bir necha soatga borardim, yotib qolishga hech qachon ruxsat berishmasdi. Shunday qilib oradan yillar o‘tdi. Ikki farzandli bo‘ldim. Har kuni ertalab soat 6:00 da turardim, yarim kechasi uxlashga yotardim. Boshqalarning manfaatlari bilan yashardim, chunki o‘zimda hech qanday manfaat yo‘q edi. Hayotimdagi asosiy maqsad oila a’zolariga xizmat qilish, ularga yaxshi ko‘rinish edi. Har kecha uxlashdan oldin o‘zimni sahnada his etar, ko‘zlarim yonib tabassum qilayotganimni tasavvur qilardim. Faqat tushimda o‘zimni baxtli va erkin his etardim.
Haqiqiy Lolani sog‘inardim…
Kunlardan bir kun men 40 kunlik o‘g‘limni va ikki yoshli qizimni olib u uydan ketdim va u yerga boshqa hech qachon qaytmadim”, — deb yozgandi Lola Instagram sahifasida.
Xonanda 2017-yilda samarqandlik Bois ismli tadbirkorga turmushga chiqqanini ma’lum qildi. U turmush o‘rtog‘ining ishlari tufayli bir muddat Rossiyada yashadi. 2020-yilda qizlari Aisha tug‘ilganidan so‘ng juftlik Toshkentga ko‘chib keldi.
“O‘zgarish vaqti keldi. Birinchidan, bu mening biror narsani tubdan o‘zgartirishga ichki tayyorgarligim. Men har doim qaytib kelishimizni bilardim. Biroq o‘tgan yili bu lahzalar yaqinda sodir bo‘lishini his qildim. Umuman olganda, men hayotga ishonish kerakligini tushunib yetdim, u hamma narsani o‘z vaqtida va kerakli tarzda qiladi. Bir xil sharoitda, bir joyda bo‘lganimda qiziqishlarimni yo‘qotaman va zerikaman”, — degan edi bu haqda Lola.
Otasining vafot etganidan so‘ng ancha paytgacha o‘ziga kela olmagan
2020-yilning 31-mart kuni Lolaning otasi Ravshanbek Yo‘ldoshev yurak xurujidan vafot etdi. Xonanda o‘shanda oilasi bilan Rossiyaning Moskva shahrida edi. Pandemiya tufayli aviareyslar cheklangani bois Lola otasining ma’rakalariga kela olmadi. Xonanda otasining o‘limidan keyin ancha vaqtgacha o‘ziga kela olmagani haqida muxlislariga so‘zlab bergan edi.
“Otam sochining uchigacha intelligent odam edi. U eng aqlli, mehribon, nihoyatda iste’dodli inson edi. U har doim o‘zini og‘ir-bosiq tutar, past, yoqimli ovozda gapirardi. O‘ylashimcha, u javobini bilmaydigan bironta ham savol yo‘q edi. Har doim to‘g‘ri, dono maslahat berardi. Men har doim ijod va shaxsiy hayotga oid maslahatlarni undan so‘rardim. U har doim mening suyanchig‘im edi. U o‘zini sevardi, o‘ziga qarardi, har doim did bilan kiyinardi. Yana uning qo‘llari juda chiroyli edi. U tug‘ishimga kelishini aytgandi, men uni rosa kutayotgan edim. Biz u bilan o‘limidan bir kun avval gaplashgan edik. Ikkalamiz ham bu oxirgi marta ekanligini bilmagandik”, — degan edi Lola.
Xonanda zararli odatlari haqida
Lolaning ham ko‘plab insonlar singari zararli odatlari bor. Xonanda muxlislariga atalgan postida punktuallik (o‘z vaqtida ulgurish) borasida ajralib turmasligi va ko‘pincha hamma joyga kechikib yurishiga iqror bo‘ldi, buni esa ishlarni doim keyinga qoldirishi bilan izohlagan edi. Bundan tashqari, qo‘shiqchi o‘zini qahvada cheklamasligini, bir kunda bu ichimlikdan ikki finjon ham ichishi mumkinligini qayd etgan edi. Shuningdek, Lola kir yuvish mashinasidan yuvib bo‘lingan kiyimlarni chiqarib yoyib qo‘yishni unutishi, ancha vaqtdan keyin esa ularni qaytadan yuvishi haqida yozgan edi.
Ko‘p tanqid qilinadigan xonanda
Lola kiyinish uslubi va kliplaridagi sujetlar tufayli tez-tez muhokamalar markazida bo‘lib keladi. Xeyterlar uning qo‘shiqlari so‘zlari, Instagram sahifasidagi postlarini ham tanqid ostiga oladi. 2019-yilda Lola “Sevgingni menga ayt” deb nomlangan qo‘shig‘iga suratga olingan klipda o‘zbek shou-biznesidagi senzurani aks ettirgan. 7 daqiqalik klip xonandaning muxlislari tomonidan iliq qarshi olingan.
Xonanda hozirda yana faol ijodga qaytgan. U tez kunlarda muxlislari e’tiboriga ikkita yangi qo‘shig‘i hamda ularga ishlangan kliplarni taqdim etishni rejalashtirmoqda.
Izoh (0)