O‘zbekistonda 24 yil ichida yarim million nafardan ortiq ayollarga 54 yoshdan yoshga doir pensiya tayinlangan. Bu haqda Pensiya jamg‘armasi maʼlum qildi.
Jamg‘arma xabariga ko‘ra, 1999-yil 1-iyuldan 20 yillik mehnat stajiga ega bo‘lgan ayollarga 54 yoshdan, ya’ni umumiy belgilangan yoshdan 1 yil oldin yoshga doir pensiya tayinlash yo‘lga qo‘yilgan.
Hisob-kitoblarga qaraganda, 1999-yil 1-iyuldan 2023-yil 1-avgustga qadar 555 ming 385 nafar ayollarga 54 yoshdan yoshga doir pensiya tayinlangan. Shundan belgilangan muddatidan bir yil avval tayinlangan pensiya 2022-yilda eng ko‘p (41 710 nafar) qayd etilgan. Eng kam ko‘rsatkich esa 1999-yilda — 4 ming 960 nafar ayollar 54 yoshdan yoshga doir pensiyaga chiqqan.
Joriy yilning yanvar—iyul oylarida 22 ming 638 nafar ayolga 54 yoshdan yoshga doir pensiya berila boshlangan.
Eslatib o‘tamiz, O‘zbekistonda 20 yildan kam mehnat stajiga ega bo‘lgan ayollarga qonunchilikka muvofiq, 55 yoshdan umumiy asoslarda yoshga doir pensiya tayinlanadi.
Maʼlumot uchun, bugungi kunda mamlakatda pensiya oluvchilar soni 3,8 million nafardan ortiqni (1-iyul holatiga) tashkil etadi. Shundan yoshga doir pensiya oluvchilar 3,2 million nafardir. Hozirda davlat pensiyalarining barcha turlari uchun yillik 53,5 trillion so‘m to‘lanmoqda. Bunda bir oylik o‘rtacha xarajatlar miqdori 4,5 trillion so‘mni tashkil etadi.
Izoh (0)