Gruziyaning hukmron partiyasi “Gruziya orzusi — Demokratik Gruziya” hukumat rad etganiga qaramay, prezident Salome Zurabishvili Yevropaga safar qilgani tufayli unga qarshi impichment jarayonini boshlaydi. Bu haqda brifingda partiya raisi Irakliy Kobaxidze aytib o‘tdi.
Gruziyaning hukmron partiyasi prezident Germaniyaga tashrifi orqali konstitutsiyani buzganini aytib o‘tdi.
“Impichmentni yakunlash uchun 100 nafar parlamentariyning qo‘llab-quvvatlashi talab qilinadi, bundan tashqari, radikal muxolifatning ovozisiz uni ijro etishning iloji yo‘q. Biroq, shunga qaramay, partiya siyosiy kengashi yig‘ilishida prezidentga qarshi impichment jarayonini boshlashga qaror qildi”, — dedi Kobaxidze.
Uning tushuntirishicha, Zurabishvili konstitutsiyani qo‘pol ravishda buzgan, unga ko‘ra, prezident tashqi siyosatda vakillik funksiyalarini faqat hukumat roziligi bilan amalga oshirishi mumkin. Kobaxidzening so‘zlariga ko‘ra, prezidentning impichmenti “radikal muxolifat va Salome Zurabishvilining Gruziyaning davlat manfaatlariga, hamda YIga aʼzolik uchun nomzod maqomini olishga zid bo‘lgan umumiy kun tartibini fosh qiladi”.
Partiya raisining taʼkidlashicha, Zurabishvili “ikki tomonlama o‘yin qilyapti” — bir tomondan, Gruziyaning YIga nomzod maqomiga ega bo‘lish imkoniyatlari yuqori ekanini bila turib, o‘zi uchun siyosiy “ochkolar” qo‘lga kiritishga harakat qilmoqda, ikkinchi tomondan, mamlakatning maqom olishiga to‘sqinlik qiladigan harakatlarni amalga oshirmoqda.
Gruziya konstitutsiyasi, Kobaxidze ta’kidlaganidek, agar buziladigan bo‘lsa, faqat bitta samarali huquqiy mexanizmni — impichmentni nazarda tutadi.
Avvalroq Gruziya prezidenti administratsiyasi Zurabishvilining Yevropaga rejalashtirilgan tashrifi va yil oxirida respublikaning YIga nomzod maqomini olishini qo‘llab-quvvatlash maqsadida Yevropa yetakchilari bilan uchrashuvlar o‘tkazishi haqida xabar bergan edi. Bir kun oldin Zurabishvili Berlinda Germaniya prezidenti Frank-Valter Shtaynmayer bilan uchrashdi. Juma kuni u Bryusselda Yevropa kengashi rahbari Charlz Mishel bilan uchrashishi rejalashtirilgan. Gruziya hukumati avvalroq Zurabishvilining avgustdan dekabrgacha turli mamlakatlarga rejalashtirilgan safarlarini yozma ravishda rad etganini ma’lum qilgandi.
Izoh (0)