Aktrisa Zamira Beshimova “Daryo”ning YouTube’dagi kanaliga bergan intervyusida sobiq turmush o‘rtog‘i tomonidan zo‘ravonlikka uchragani va u bilan xiyonat qilgan dugonasi bilan bugungi munosabatlari qanday ekaniga oydinlik kiritib o‘tdi.
— Rostini aytish kerak, u paytda menga ham oson bo‘lmagan. Men o‘qigan, ayollar huquqlari va gender tengligi bo‘yicha xotin-qizlarga seminar treninglar o‘tgan bo‘lsam-da, qiyin kunlarni boshdan kechirganman. Ikki yil davomida ruhiy zo‘ravonlik, kamsitish va qo‘l ko‘tarish holatlari bo‘lgan bo‘lsa-da, bu haqida hech kimga aytganim, o‘zimni himoya qilishga uringanim yo‘q. Chunki jamiyatning o‘zi ayollarni shunday yashashga majbur qilar ekan. Ya’ni bizda ayollar ma’lum bir qolip bo‘yicha yashashga majbur. Siz ayol, kelin va onamisiz, demak, indamay hammasiga chidashga majbursiz, deb majbur qilishadi.
Oilam tinch bo‘lishini istab, hayotimdagi muammolarni hatto onamga aytishni ham istamaganman. Chunki jamiyatimizda ajrashdimi, demak bir balosi bor, hamma ayb ayol kishida degan tamg‘adan qo‘rqib, hammasini ichimga yutdim. Men-ku, hayotda o‘z o‘rnini topib, shunday zulmga chidagan bo‘lsam boshqa ayollar qanday yasharkin, deb ko‘p o‘ylayman. Chunki 16 yoshida ota-onasining qistovi bilan turmushga chiqqan, o‘qimagan, qo‘lida kasb-kori yo‘q ayollar oz emas.
Yaqinda kelinchakning turmush o‘rtog‘i tomonidan urib o‘ldirgani haqidagi xabarni o‘qib, bir necha kun o‘yladim. U ayol endigina institutning ikkinchi bosqichida tahsil olar ekan. Bo‘lajak shifokorni o‘zidan 10 yosh katta yigitga turmushga berishgan. Eng qizig‘i, u ilmga aloqasi bo‘lmagan sohada faoliyat yuritar ekan. Qiz bir necha marta oilaviy muhitidan nolib, ota-onasiga qo‘ng‘iroq qilgan. Ammo uning ham yaqinlari boshqa ota-onalar singari “Chida, hammasi iziga tushib ketadi”, deb yupatishgan. Natija esa bir begunoh insonning o‘limi bilan yakunlandi. Rosti shu xabarlar haqida eshitganimda, hayotimdagi ba’zi voqealar qayta jonlanadi. U qiz-ku ota-onasiga aytishga o‘zida kuch topibdi, men esa hayotda ko‘p qiynalgan onamga bu haqida aytishga ham, jur’at qilolmaganman. Ko‘zim ko‘karib, tirnalib ko‘chaga chiqqanimda ham atrofdagilar hayotim haqida so‘rashsa, o‘zimni baxtlidek ko‘rsatishga, kulib hammasi yaxshi ekaniga ishontirishga harakat qilardim, — deydi aktrisa Zamira Beshimova.
Aktrisa oilalarning ajrashishiga nimalar sabab bo‘layotgani va xiyonatlarning ildizi nimalarga borib taqalishi haqida ham o‘z mulohazalarini aytib o‘tdi.
.jpg)
— Avvaliga hammasi yaxshi bo‘ladi. Afsuski, oradan vaqt o‘tib, ayol homilador bo‘lib farzandli bo‘lganidan keyin inqiroz davri boshlanadi. Ayol ona bo‘lgach, mas’uliyatni o‘z zimmasiga oladi. Shu kunga qadar ayolidan mehr olib yurgan erkak birdan yolg‘izlikni his qiladi. Aynan shu davrdan boshlab er va xotin munosabatlari buzilishni boshlaydi. Erga mehr kerak, ayol esa bolasi, ro‘zg‘or ishlaridan ortmay qoladi. Erkak kishi jismonan yetuk bo‘lishi mumkin, ammo ko‘p hollarda oila qurishga ruhan tayyor bo‘lmaydi. Shu bois o‘g‘il bolalarni uylantirishga shoshmaslik kerak. Oilaga ruhan tayyor bo‘lmagan oilalarda ajralish holatlari ko‘p uchraydi, — deydi aktrisa.
Zamira Beshimova sobiq turmush o‘rtog‘ini yo‘ldan urgan dugonasini kechirgani haqida ham so‘zlab berdi.
— Qizig‘i shundaki, u dugonam bilan hozir muloqotdaman. To‘g‘ri, avvalgidek yaqin munosabatda emasmiz, ammo uni kechirganman. Ancha xato va qiyin kunlarni boshidan kechirdi, nimalar qilganini ham angladi. Menimcha, o‘tgan ishlardan o‘ziga tegishli xulosani oldi. Shunday deb hisoblaganim uchun ham uni kechirdim va aloqalarni tikladim. Ammo avvalgidek oilamga yaqinlashishini istamayman. Bilasizmi, hayotda anglagan haqiqatim shundaki, inson kechirimli bo‘lishi va qalbida gina saqlamasligi kerak, — deydi aktrisa Zamira Beshimova.
Izoh (0)