Buyuk Britaniya tashqi ishlar vaziri Jeyms Kleverli bilan Xitoyga borgan amaldorlarning kompyuterlari “tozalanadi” va safar davomida ularga berilgan telefonlar yo‘q qilinadi. Bu haqda “Daily Mail” xabar berdi.
Ta’kidlanishicha, Britaniya delegatsiyasining barcha aʼzolari Xitoyga safari oldidan bir necha hafta davomida xavfsizlik bo‘yicha treningdan o‘tgan. Treningda Xitoy maxsus xizmatlarining ish uslublari haqida so‘zlab berilgan. Xususan, mehmonxona xonalarida muloqotni tinglash, kompyuter va smartfonlarni ishdan chiqarish, shuningdek, chiroyli ayollardan o‘g‘irlik va shantajda foydalanish kabi.
Britaniyaning Milliy kiberxavfsizlik markazi tavsiyasiga ko‘ra, delegatsiyaning barcha a’zolariga safarga shaxsiy smartfon va noutbuklarini olib ketmaslik buyurilgan. Ularga maxsus xarid qilingan yangi qurilmalar berilgan. Britaniyaga qaytgach, barcha davlat kompyuterlarining qattiq disklari tozalanadi, josuslik dasturlari tahdidi tufayli “bir martalik” telefonlar yo‘q qilinadi.
Eslatib o‘tamiz, 30-avgust kuni Jeyms Kleverli Pekinga yetib keldi. Bu Britaniya tashqi ishlar vazirining so‘nggi besh yil ichidagi Xitoyga birinchi tashrifi hisoblanadi.
Izoh (0)