Tojikistonda 27-avgust kuni kuzatilgan kuchli yog‘ingarchilik oqibatida Vahdat shahri va Rudakiy tumanida 13 kishi halok bo‘ldi. Bu haqda respublika prezidenti matbuot xizmatiga tayanib, Asia Plus xabar bermoqda.
Vahdatda 11 kishi, Rudakiyda 2 kishi tabiiy ofat qurboniga aylangan. Ular aynan qanday sharoitda halok bo‘lgani haqida tafsilotlar keltirilmagan.
Tojikiston prezidenti Emomali Rahmon halok bo‘lganlarning oila a’zolariga va yog‘ingarchilik oqibatlarini boshdan kechirgan barchaga chuqur hamdardlik bildirdi.
Davlat rahbari bosh vazirga, Favqulodda vaziyatlar va fuqaro mudofaasi qo‘mitasiga, shuningdek, boshqa vakolatli organlarga halok bo‘lganlarning oila aʼzolariga tez yordam ko‘rsatish, favqulodda hodisa oqibatlarini bartaraf etish bo‘yicha tezkor chora-tadbirlar ko‘rish yuzasidan tegishli topshiriqlar berdi.
Yakshanba kungi kuchli yog‘ingarchilik Dushanbe—Xo‘jand yo‘lining ayrim qismlariga ham jiddiy zarar yetkazgan: u yerda sel va ko‘chki sodir bo‘lgan, tepalikdagi toshlar yumalab tushgan. Magistral yo‘lda harakat vaqtincha to‘xtatildi.
Tojikistonlik sinoptiklar 27—28-avgust kunlari beqaror ob-havo haqida ogohlantirgan.
Izoh (0)