Murojaatchilardan biri Pensiya jamg‘armasiga 10 yildan beri Rossiyada ishlashi, bu davr uchun unga ish staji qanday hisoblanishi haqida savol yo‘llagan. Jamg‘arma javobiga qaraganda, chet elda ishlangan davrlar bir necha shartlar asosida mehnat stajiga qo‘shiladi.
Qonunchilikka ko‘ra, chet elda ishlangan davrlar quyidagi shartlarga ko‘ra ish stajiga qo‘shiladi:
- 2019-yil 1-yanvargacha bo‘lgan davr uchun Pensiya jamg‘armasiga sug‘urta badallari to‘langan taqdirda;
- 2019-yil 1-yanvardan 2019-yil 31-dekabrgacha bo‘lgan davrda yagona ijtimoiy to‘lov to‘langan taqdirda;
- 2020-yil 1-yanvardan ijtimoiy soliqlar to‘langanda.
Mehnat shartnomasi tuzmagan holda chet elda ishlayotgan O‘zbekiston fuqarolari mehnat stajiga ega bo‘lish uchun ijtimoiy soliq to‘lash huquqiga ega emas.
O‘zbekiston fuqarolarining yollanma (bitim) asosda chet elda ishlagani hukumat vakolat bergan organlar mehnat daftarchasiga kiritgan qaydnomalarga qarab aniqlanadi.
Chet el fuqarolariga va fuqaroligi bo‘lmagan shaxslarga chet eldagi ishi O‘zbekistonda ishlanganiga to‘g‘ri keladigan stajning 1/3 hissasidan oshmagan miqdorda, stajga qo‘shiladi.
Avvalroq mamlakatda ish staji kimlarga ikki barobar qo‘shib hisoblanishi maʼlum qilingandi.
Izoh (0)