O‘zbekistonga 2023-yilning yanvar—iyul oylarida jami 3,7 million nafar chet el fuqarolari turistik maqsadlarda tashrif buyurdi. Bu haqda Statistika agentligi xabar berdi.
Qayd etilishicha, O‘zbekistonga 7 oyda eng ko‘p Tojikiston fuqarolari turistik maqsadda tashrif buyurgan — 1 million 151,4 ming nafar. Undan keyingi o‘rinda Qirg‘iziston (912,8 ming) va Qozog‘iston (879 ming) turibdi.
Shuningdek, quyidagi davlatlardan ham mamlakatga xorij fuqarolari turistik maqsadda kelgan:
- Rossiya — 417,4 ming nafar;
- Turkiya — 58 ming nafar;
- Turkmaniston — 39,6 ming nafar;
- Janubiy Koreya — 20,2 ming nafar;
- Hindiston — 20 ming nafar;
- Xitoy — 17,7 ming nafar;
- Germaniya — 14,1 ming nafar.
Sayyohlar soni va xizmatlar eksporti
Hisob-kitoblarga ko‘ra, 2019-yilda respublikaga kirib kelgan sayyohlar soni 2016-yilga nisbatan 3,3 baravarga oshgan. O‘sha yili qariyb 6,7 million nafar turist O‘zbekistonda sayohat qilgan. Buning natijasida 1,6 milliard dollarlik turistik xizmatlar eksporti amalga oshirilgan. Mazkur ko‘rsatkich 2016-yilda 430,7 million dollarga teng bo‘lgan.
2020-yilda mamlakatga 7 million nafardan ortiq xorijiy sayyoh tashrifi kutilgandi. Biroq og‘ir pandemiya sharoitida barcha sohalar qatori turizm ham qattiq zarbaga uchradi, sayyohlar soni sezilarli darajaga kamaydi. Yaʼni 2020-yilda respublikaga 1,5 million nafar sayyoh kelgan, 261 million dollarlik turizm xizmatlari eksport qilingan.
Izoh (0)