O‘zbekistonda 8 209 moddiy madaniy meros obyekti davlat muhofazasiga olingan. Bu haqda Madaniy meros agentligi ma’lum qildi.
Qayd etilishicha, shundan 4 748 tasi arxeologiya, 2 252 tasi arxitektura obyekti, 678 tasi monumental sanʼat asari, 532 tasi diqqatga sazovor joylar hisoblanadi. O‘zbekiston musulmonlari idorasi huzuridagi Vaqf xayriya jamoat fondiga 189 obyekt tekin foydalanish uchun berilgan.
Vazirlar Mahkamasining 2023-yil 31-maydagi bayoni bilan 2023-yilda 158 madaniy meros obyektida ilmiy-texnik tadqiqotlar o‘tkazish, loyiha-smeta hujjatlarini ishlab chiqish hamda asrashga doir ishlarni amalga oshirish belgilangan. Bu maqsad uchun budjet mablag‘lari hisobidan 150 milliard so‘m ajratilgan.
2023-yilda 104 madaniy meros obyektidan 59 tasining loyiha hujjati ishlab chiqilgan va ilmiy ekspert kengashiga kiritilgan. Shundan 47 obyektning loyiha hujjati maʼqullangan, 27 obyektning loyiha-smeta hujjati shaharsozlik ekspertizasi xulosasi olish uchun kiritilgan.
Ayni paytda taʼmirlash tiklash ishlarini amalga oshirish maqsadida 400 nafardan ortiq mahalliy usta-restavratorlar faoliyat yuritmoqda. Eron va Turkiya davlatlaridan 40 nafarga yaqin restavratorlarni jalb etish va ular bilan tajriba almashish rejalashtirilgan.
2023-yilda davlat muzeylarini mukammal taʼmirlash uchun ajratilgan mablag‘lar hisobidan 13 davlat muzeyida taʼmirlash ishlari boshlangan. Buning uchun esa budjetdan 8,85 milliard so‘m ajratilgan.
Bundan oldin, Madaniy meros agentligi ijtimoiy tarmoqlarda Xudoyorxon o‘rdasining bir qismi ijaraga berilayotgani aytilgan xabarlarga munosabat bildirgandi. Shuningdek, Surxondaryoda arxeologik yodgorliklar tuprog‘idan molxona, hojatxona qurilgani aniqlangan edi.
Izoh (0)