Moskva viloyatining Naxobino qishlog‘ida tojikistonlik yigit shortida yugurib yurgan notanish qizni urdi. Politsiya holat yuzasidan Tojikiston fuqarosini qo‘lga oldi. Bu haqda SHOT xabar berdi.

Aniqlanishicha, qizni urgan yigit 20 yoshda bo‘lib, mahalliy boshqaruv kompaniyasi ishchisi hisoblanadi. U yugurishga chiqqan notanish qizni qo‘lidan ushlab, “Nega bunaqa kiyinib olding?”, deb uning yuziga musht tushirgan. Mahalliy aholi tojikistonlik yigitga qiz sport kiyimida ekanini tushuntirgan.

Ta’kidlanishicha, jabrlanuvchi yengil atletika bo‘yicha sport ustasi, u doimiy ravishda yugurishlarga tayyorlanadi. Qiz holat yuzasidan politsiyaga ariza yozgan. Uning labi yorilib, yuzi shishgan. Migrant qilgan ishini tan olgan va politsiya uni qo‘lga olishiga qarshilik ko‘rsatmagan.

Hozirda Tojikiston fuqarosiga qarshi jinoyat ishi qo‘zg‘atilgan. U bir yil oldin “miyasida turli tovushlarni eshitayotgani” uchun ruhiy kasalxonada davolangani aniqlandi.