“Umumiy harbiy majburiyat va harbiy xizmat to‘g‘risida”gi qonunda safarbarlik chaqiruvi rezervidagi harbiy xizmatni (bir oylik xarbiy xizmat) o‘tash bo‘yicha tartiblar belgilangan.
Kimlar 1 oylik harbiy xizmatga chaqiriladi?
Qonunning 6-moddasiga ko‘ra, harbiy xizmatga yaroqli, shu jumladan, cheklovlar bilan yaroqli bo‘lgan hamda chaqirilish muddatini kechiktirish va chaqirilishdan ozod etilish huquqiga ega bo‘lmagan, biroq Qurolli kuchlar safiga navbatdagi muddatga chaqirilmagan shaxslar safarbarlik chaqiruvi rezervi safiga olinadi.
Safarbarlik chaqiruvi rezervidagi harbiy xizmat o‘tashga kirishmoqchi bo‘lgan fuqaro Mudofaa vazirligining maxsus hisobvarag‘iga pul to‘laydi. Hozirda to‘lov qiymati 6 million 860 ming so‘mni tashkil etadi.
“Safarbarlik chaqiruvi rezervidagi xizmat safiga shaxslar 27 yoshga to‘lgunga qadar olinadi va har yilgi harbiy yig‘inlarga jalb etilishlari mumkin, favqulodda vaziyatlar yoki O‘zbekistonga qarshi harbiy tajovuz ro‘y bergan taqdirda, haqiqiy harbiy xizmatga chaqiriladilar”, — deyiladi qonunda.
Harbiy xizmat uchun to‘langan pullar nimalarga sarflanadi?
Safarbarlik chaqiruvi rezervidagi xizmat safiga olingan shaxslar to‘laydigan pul badallari miqdori va ularni to‘lash tartibi O‘zbekiston prezidenti tomonidan tasdiqlanadigan alohida nizom bilan belgilanadi. Bu mablag‘lar:
- safarbarlik chaqiruvi rezervidagi xizmatchilar bilan yig‘inlarni o‘tkazishga bog‘liq xarajatlarning o‘rnini qoplashga;
- qaysi tegishli vazirliklar va idoralarda muddatli harbiy xizmat nazarda tutilgan bo‘lsa, o‘sha vazirliklar va idoralarning muddatli harbiy xizmatdagi harbiy xizmatchilari harbiy xizmatdan bo‘shatilganida xizmatdan bo‘shatish nafaqasini to‘lashga;
- yig‘inlar maʼmuriyatining taʼminotiga;
- Mudofaa vazirligining moddiy-texnik bazasini rivojlantirish hamda mustahkamlashga, shu jumladan, binolarni taʼmirlash va qurishga, mudofaa ishlari organlaridagi safarbarlik chaqiruvi rezervidagi xizmatchilarni hisobga oluvchi xodimlarning taʼminotiga;
- Mudofaa vazirligi ehtiyojlari uchun qurol-yarog‘, harbiy-texnika mol-mulki va o‘q-dorilarni xarid qilishga maqsadli tartibda yo‘naltiriladi.
Kimlar harbiy xizmatga chaqiruvdan ozod qilinadi?
Qonunning 22-moddasida muddatli harbiy xizmatga hamda safarbarlik chaqiruvi rezervidagi xizmatga chaqirilishdan ozod etishga doir qoidalar keltirilgan.
Unga ko‘ra, tinchlik davrida muddatli harbiy xizmatga hamda safarbarlik chaqiruvi rezervidagi xizmatga chaqirilishdan quyidagilar ozod etiladilar:
- salomatligiga ko‘ra harbiy xizmatga yaroqsiz deb topilgan chaqiriluvchilar;
- yaqin qarindoshlaridan biri (aka-ukasi, opa-singlisi) harbiy xizmatni o‘tash vaqtida halok bo‘lgan yoki vafot etgan chaqiriluvchilar;
- ro‘yxatdan o‘tgan diniy tashkilotlardan birida diniy rutba egasi bo‘lgan chaqiriluvchilar.
Qonunda jinoiy javobgarlikka tortilgan, shuningdek, sudlanganlik holati tugallanmagan yoki sudlanganligi olib tashlanmagan fuqarolar harbiy xizmatga chaqirilmasligi belgilangan.
Harbiy xizmatdan bo‘yin tovlash
Qonunning 51-moddasida mansabdor shaxslar hamda fuqarolarning umumiy harbiy majburiyat va harbiy xizmat to‘g‘risidagi qonunchilikni buzganlik uchun javobgarligi belgilangan.
Xususan, O‘zbekiston fuqarolari harbiy xizmatdan bo‘yin tovlagan taqdirda, amaldagi qonunchilikka muvofiq jinoiy javobgarlikka tortiladi.
“Davlat organlarining, shuningdek, mulk shaklidan qatʼi nazar, korxonalar, muassasalar, tashkilotlarning umumiy harbiy majburiyat va harbiy xizmat to‘g‘risidagi qonunchilikni buzganlikda aybdor rahbarlari, boshqa mansabdor shaxslari, fuqarolar qonunchilikda belgilangan tartibda javobgar bo‘ladilar”, —deyiladi qonunda.
O‘zbekistonda safarbarlik chaqiruv rezervining (1 oylik harbiy xizmat) to‘lov badali mehnatga haq to‘lashning eng kam miqdorining 7 barobariga (6 mln 860 ming so‘m) teng ekani xabar qilingandi.
Izoh (0)