Pensiya jamg‘armasi fuqarolardan birining: “Men davlat tashkilotida ishlayman. Turmush o‘rtog‘im hech qayerda ishlamaydi. Turmush o‘rtog‘im uchun Pensiya jamg‘armasiga ijtimoiy soliq to‘lasam ish stajiga inobatga olinadimi”, degan savoliga javob qaytardi.
Foto: “Daryo”
Maʼlum qilinishicha, mazkur masala bo‘yicha “Fuqarolarning davlat pensiya taʼminoti to‘g‘risida”gi qonun hamda hukumat nizomida aniq tartib belgilangan. Qonunchilikka ko‘ra, jismoniy shaxs tomonidan mehnatga haq to‘lash tarzidagi o‘z daromadlaridan 2021-yil 1-iyundan keyingi davrda ishlamaydigan eri (xotini) uchun ixtiyoriy asosda Soliq kodeksida belgilangan tartibda ijtimoiy soliq to‘langan davr pensiya hisoblashda ish staji hisobida inobatga olinadi.
“Jismoniy shaxs mavjud imkoniyatlardan kelib chiqib turmush o‘rtog‘i uchun Pensiya jamg‘armasiga ijtimoiy soliq miqdorini mustaqil ravishda to‘lash huquqiga ega. Jismoniy shaxs tomonidan to‘langan to‘lov hujjatida uning ishlamaydigan eri (xotini)ning familiyasi, ismi, otasining ismi, JSHSHIR va to‘lov amalga oshirilayotgan davr albatta ko‘rsatilishi shart”, — deyiladi jamg‘arma axborotida.
Qo‘shimcha qilinishicha, agar to‘lov hujjatida davr ko‘rsatilmagan bo‘lsa, to‘lov u amalga oshirilayotgan oy uchun to‘langan deb hisoblanadi. Ijtimoiy soliq jismoniy shaxsning doimiy yashash joyi bo‘yicha Pensiya jamg‘armasining Iqtisodiyot va moliya vazirligining Yagona g‘azna hisobvarag‘ida ochilgan shaxsiy g‘azna hisobvarag‘iga to‘lanadi. To‘langan ijtimoiy soliq hisobi davlat soliq xizmati organlarida yuritiladi.
Izoh (0)