Shimoliy Koreyalik taekvondochilar Qozog‘istondagi musobaqaga yo‘l oldi

Shimoliy Koreyalik taekvondochi deb taxmin qilingan bir guruh odamlar Xitoy chegarasini kesib o‘tdi, deya xabar bermoqda BBC.

Ma’lum bo‘lishicha, ular Qozog‘istonda bo‘lib o‘tadigan taekvondo bo‘yicha jahon chempionatiga yo‘l olgan. Bu esa Pxenyan 2020-yil koronavirus pandemiyasidan keyin ilk bor sport jamoasini chet elga yuborganini anglatadi. Sportchilar Qozog‘iston poytaxti Ostonaga borishdan oldin Pekinga yo‘l olgan. 

Ikkita yashil avtobus Shimoliy Koreya va Xitoyni ajratib turuvchi Yali daryosi yonidan o‘tib ketayotgani aniqlangan. 

2020-yilda pandemiya boshlangach, Pxenyan o‘z chegaralarini berkitib qo‘ygandi va shundan buyon hech kimga mamlakatdan chiqib ketish yoki kirishga ruxsat berilmagandi. 

Taekvondochilar xorijga yuborilgan ilk taniqli sportchilar bo‘lib, bu Pxenyan nihoyat chegaradagi cheklovlarni yumshatishi mumkinligini ko‘rsatadi. 

So‘nggi xabarlarga ko‘ra, hukumat tez orada o‘z fuqarolariga yana mamlakatga kirishga ruxsat berishga tayyorlanmoqda. Ma’lumot uchun, o‘n minglab Shimoliya Koreya ishchilari hamon Xitoy va Rossiyada. 

Iyul oyida Rossiya va Xitoy delegatsiyalari Koreya urushidagi sulhning 70 yilligini nishonlash uchun Pxenyanda bo‘lgandi. Ular chegaralar yopilganidan keyingi 3 yil mobaynida mamlakatga taklif qilingan ilk xorijiy guruhlar edi.