O‘zbekiston avtomobil bozoridagi mavjud vaziyatni baholagan Iqtisodiy tadqiqotlar va islohotlar markaziga ko‘ra, iyun oyidagi keskin pasayishdan so‘ng, avtomobil bozori yana ko‘tarildi.
Iyul oyida avtotransport vositalari oldi-sotdisi bo‘yicha 144,5 mingta shartnoma tuzilgan. Bu undan avval oyga nisbatan 17 foizga, 2022-yilning iyuliga nisbatan esa 40 foizga ko‘p. Ushbu oyda sotilgan yengil avtomobillarning umumiy soni 20 foizga o‘sib, 132 mingdan oshgan. Eng sezilarli o‘sish Buxoro — 36 foiz, Sirdaryo — 35 foiz va Surxondaryo viloyatlarida — 31 foiz qayd etilgan.
Birlamchi bozorda yangi yengil avtomobillar savdosi 19,2 foizga oshgan. O‘tgan yilga nisbatan o‘sish 64,5 foizni tashkil etgan. Bir oy davomida mahalliy ishlab chiqarilgan 29,6 mingta yangi yengil avtomobil sotilgan. Bu iyun oyiga nisbatan 24 foiz va o‘tgan yilning shu davriga nisbatan 59,3 foiz ko‘proq.
Xorijda ishlab chiqarilgan yengil avtomobillarga talab undan ham oshgan. Iyul oyi davomida 4,9 mingta xorijda ishlab chiqarilgan yangi yengil avtomobillar sotilgan. Bu 2022-yil iyul oyidagi ko‘rsatkichdan 2,7 baravar yuqori.
Iyul oyida yengil avtomobillarning ikkilamchi avtomobil bozori sotuvlarning o‘sishi bilan ajralib turdi. Oy davomida 97,6 ming dona yengil avtomobillar sotilgan bo‘lib, bu bir oy oldingiga nisbatan 17,6 foizga ko‘pdir. Shu bilan birga, 2022-yilning iyul oyiga nisbatan 30 foizga sezilarli o‘sish qayd etilgan.
Iyul oyida fuqarolar 2,7 mingta elektromobil sotib olgan bo‘lib, bu iyun oyiga nisbatan 28,9 foizga, 2022-yil iyul oyiga nisbatan 4,7 baravar ko‘pdir. Eng ko‘p elektromobillar Toshkent shahri (1,9 ming dona), Toshkent (153 dona) va Xorazm viloyatlarida (117 dona) sotilgan.
Elektromobillarning ikkilamchi bozori savdoning pasayishi bilan ajralib turdi. Oy davomida 318 dona elektromobil sotilgan bo‘lib, bir oyda 15,2 foiz pasaygan. Biroq 2022-yil iyul oyiga nisbatan 67 foizga o‘sish kuzatilgan.
Izoh (0)