Mayami politsiyasi shahar ko‘chalarida jinoyatchilardan tortib olingan qurollarni Ukraina milliy politsiyasiga topshirdi. Bu haqda Ukraina politsiyasi matbuot xizmati xabar berdi. Qurollarni topshirish marosimi Mayami bilan birodar-shahar statusini olgan Irpenda bo‘lib o‘tdi.
“Bugungi tadbir Ukraina politsiyasi uchun katta ahamiyatga ega. Ko‘chada bosqinchilardan tortib olingan qurollar jinoyat quroli sifatida ishlatilishi mumkin edi. Ammo, bizning bo‘linmalarimizga o‘tkazilgan ushbu qurollar tartib va xavfsizlikni saqlash, ukrainaliklarni himoya qilish vositasiga aylanadi”, — dedi Milliy politsiya rahbari o‘rinbosari Gennadiy Fedoryuk.
Mayami politsiyasi boshlig‘i Manuel Morales qurol-yarog‘larning topshirilishini Amerika politsiyasi uchun ulkan sharaf deb atadi va Ukraina politsiyasini har tomonlama qo‘llab-quvvatlashga va’da berdi. Mayami politsiyasi, shuningdek, Irpendagi tuman politsiya bo‘limini tiklashga yordam bergan.
Ukraina milliy politsiyasi olingan qurollarning modellarini oshkor qilmadi. Xabarga ilova qilingan rasmlarda to‘pponcha, revolver va avtomatlarning turli modellarini ko‘rish mumkin.
Ukraina xalq deputati Marian Zabolotskiyning aniqlik kiritishicha, Mayami politsiyasi 101 dona qurol topshirgan, yaqin orada AQSHning boshqa shahridan Kiyevga 600 dan ortiq qurol olib kelinishi kutilmoqda.
Izoh (0)