Oliy taʼlim, fan va innovatsiyalar vaziri Ibrohim Abdurahmonov Toshkent shahrida joylashgan oliy taʼlim muassasalari rektorlari va prorektorlari bilan uchrashib, talabalar turar joylari masalasini muhokama qildi. Bu haqda vazirlik matbuot xizmati xabar berdi.
Yig‘ilishda yotoqxonalarni yangi o‘quv yiliga shay holatga keltirish, moddiy-texnik bazasi bilan to‘liq taʼminlanishi, talabalar uchun ijara uylari bazasini yaratish va xonadonlar holatini o‘rganish, talabalar yotoqxonalar va ijara uylari to‘g‘risida maʼlumotlar bilan taʼminlanishini yo‘lga qo‘yish kabi vazifalar ijrosi muhokama etilgan. O‘z navbatida, oliy taʼlim muassasalari rahbariyati amalga oshirilgan ishlar yuzasidan axborot bergan.
Vazir talabalar o‘quv yilida muammolarsiz yotoqxona va ijara uylariga joylashishlari uchun barcha shart-sharoitlar yaratilishi bo‘yicha ko‘rsatmalar bergan.
Tayyorlangan yotoqxonalar yong‘in xavfsizligi, qishga tayyorgarlik darajasi, liftlari (mavjud bo‘lsa) sozligi va sertifikatsiyalanganligiga alohida urg‘u berilishi lozimligi belgilangan. Universitet hududlarida talabalarni yotoqxonalar va ijara uylariga joylashtirish markazlarini yo‘lga qo‘yishga, ularda lider talabalar hamda tyutorlarning faoliyatini tashkil qilishga kelishib olingan.
Mart oyida O‘zbekistonda 2023-yil yakuniga qadar 18 ming o‘rinli talabalar turar joylari qurilib, foydalanishga topshirilishi to‘g‘risida xabar berilgandi. O‘shanda yil yakuniga qadar talabalar turar joyi fondini 127 ming o‘rindan oshirish rejalashtirilgani aytilgan edi.
Izoh (0)