Toshkent viloyati Ekologiya boshqarmasi Ohangaron tumani inspektoriga xizmat vaqtida tan jarohati yetkazilgandi. Bosh prokuratura matbuot xizmati holat yuzasidan jinoyat ishi qo‘zg‘atilganini ma’lum qildi.
Voqea 10-avgust kuni yuz bergandi. Ekologiya, atrof-muhitni muhofaza qilish va iqlim o‘zgarishi vazirligi bergan dastlabki ma’lumotda inspektor somondan bo‘shagan yer maydonlari yoqib yuborilgani holatini o‘rganish maqsadida “Oybuloq” va “Ubay” MFY hududida joylashgan fermer xo‘jaligiga borganida bir guruh shaxslar unga qarshilik ko‘rsatgani, kuch ishlatib, tan jarohati yetkazgani keltirilgandi.
Bosh prokuratura axborotiga ko‘ra, Toshkent viloyati ekologiya atrof-muhitni muhofaza qilish va iqlim o‘zgarishi boshqarmasi Ohangaron tumani inspeksiyasi mas’ul xodimi M.A. fermer xo‘jaligidagi dala maydonida xizmat vazifasini bajarayotgan vaqtida ushbu mahallada yashovchi fuqaro F.O‘. uni urib tan jarohati yetkazib, xizmat guvohnomasi hamda ish hujjatlarini tortib olib, hujjatlariga shikast yetkazgan.
Mazkur holat yuzasidan Ohangaron tuman prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va boshqa moddalar bilan jinoyat ishi qo‘zg‘atildi.
Ushbu jinoyat ishi bo‘yicha dastlabki tergov harakatlari o‘tkazilmoqda.
Izoh (0)