Rossiya Odessa viloyatidagi Izmail portiga ketayotgan xorijiy kemani Qora dengizda o‘t ochib to‘xtatdi. Bu haqda Rossiya mudofaa vazirligi xabar berdi.
13-avgust kuni ertalab Qora dengiz flotining “Vasiliy Bikov” patrul kemasi Palau bayrog‘i ostida Izmail portiga ketayotgan “Sukra Okan” quruq yuk kemasini payqagan.
Yuk kemasi kapitani kemani tekshirish uchun to‘xtatish haqidagi talabga javob bermagan, oqibatda Rossiya kemasi ogohlantiruvchi o‘t ochgan.
Shundan so‘ng kema to‘xtagan va bir guruh rus harbiylari Ka-29 vertolyotidan unga qo‘ngan. Ular tekshiruv o‘tkazgan, shundan so‘ng kema Izmail portiga yo‘l olgan.
Rossiya Qora dengiz portlaridan Ukraina oziq-ovqat mahsulotlarini eksport qilishga ruxsat bergan don bitimidan chiqdi
Iyul oyida Rossiya don shartnomasini uzaytirishdan bosh tortdi. 20-iyuldan boshlab Rossiya Qora dengizda Ukraina portlariga ketayotgan barcha kemalarni potentsial harbiy yuk tashuvchisi deb hisoblashi, ular rus qo‘shinlarining qonuniy nishoniga aylanishi va bayroqlari ko‘tarilgan davlatlar konfliktda Ukraina tomonida ko‘rilishini bildirdi.
Shu hafta Ukraina Chernomorsk, Odessa va Yujniy portlariga suzib yuruvchi savdo kemalari uchun Qora dengizda vaqtinchalik koridorlarni ochdi. Shu bilan birga, Kiyev ularning xavfsizligini kafolatlay olmasligidan ogohlantirdi.
Izoh (0)