Tojikiston rasmiy delegatsiyasi Rossiyadagi mehnat muhojirlarining yashash sharoitlarini o‘rganish uchun Moskva, Sankt-Peterburg, Yekaterinburg, Novosibirsk va Ufaga jo‘natildi. Bu haqda Tojikiston Mehnat, migratsiya va aholi bandligi vazirligi xabar berdi.
“Tojikiston hukumati nomidan Rossiyadagi mehnat muhojirlarining yashash sharoitlari bilan tanishish va ular o‘rtasida tushuntirish ishlarini olib borish uchun ishchi guruhlar tuzildi. Beshta guruh tashkil etildi, ular Moskva, Sankt-Peterburg, Yekaterinburg, Ufa va Novosibirskka jo‘natildi”, — deyiladi Tojikiston Mehnat vazirligining Facebook’dagi xabarida.
Rossiya Ichki ishlar vazirligi maʼlumotlariga ko‘ra, 2022-yilda Rossiya pasportini olgan Tojikiston fuqarolari soni 60 foizga oshgan. Federal xavfsizlik xizmati statistik ma’lumotlarida aytilishicha, 2023-yilning birinchi choragida Tojikistondan 516 ming, ikkinchi choragida esa 548 ming fuqaro Rossiyaga kirgan.
Iyun boshida Sankt-Peterburg shahridagi “Laxta-Sentr” qurilish maydonida tojikistonlik va qirg‘izistonlik migrantlar ommaviy mushtlashgani xabar qilingandi. Qayd etilishicha, ishchilar bepul oziq-ovqat talashib, mojaro chiqargan.
Izoh (0)