Janubiy Afrika Respublikasining sobiq prezidenti Jeykob Zuma qamoqxona to‘lib ketgani va joy yo‘qligi sabab ozod etildi, deb xabar bermoqda BBC.
Sobiq davlat rahbari sudga hurmatsizlik qilgani uchun 15 oylik qamoq jazosini o‘tashi kerak edi.
Zuma JAR qamoqxonalaridagi tanglikni yumshatish uchun aprel oyida boshlangan sxema bo‘yicha ozod qilingan 9 000 dan ortiq unchalik xavfli bo‘lmagan mahbuslardan biri ekani aytilmoqda.
Respublika adliya vaziri Ronald Lamola bu qaror hech qanday siyosiy aralashuvsiz qamoqxona ma’muriyati tomonidan qabul qilingani va Zumaning unga deyarli ta’siri yo‘qligini aytdi.
81 yoshli Zuma 2021-yilda uning prezidentligi davridagi moliyaviy firibgarlik va qarindosh-urug‘chilikni tergov qilgan komissiya oldida ko‘rsatma berishdan bosh tortgani uchun qamoqqa tashlangan. Biroq u atigi ikki oy o‘tib, sog‘lig‘i sababli qamoqdan ozod qilindi.
Apellyatsiya sudi o‘tgan yilning noyabrida ozodlikni noqonuniy deb topdi va Zumani jazo muddatini o‘tash uchun qamoqxonaga qaytarishni buyurdi. Iyul oyida Konstitutsiyaviy sud qamoq jazosini bekor qilishga urinishni rad etdi.
Izoh (0)