Zimbabve prezidenti Emmerson Mnangagva saylovchilarga uning partiyasiga ovoz berishsa, jannatga tushishlarini va’da qildi. Bu haqda Associated Press xabar berdi.
Mnangagva miting o‘tkazib, tarafdorlari bilan saylov kampaniyasining qanday kechishi haqida gaplashdi. U o‘z nutqi davomida fuqarolar hukmron partiyaga ovoz bermasa, unga xiyonat qilgan bo‘lishini ta’kidladi.
“Qo‘lga kiritilgan mustaqilligimizni mustahkamlash uchun bizga yorqin g‘alaba kerak”, — dedi prezident.
Mnangagva jannatga borish va’dalaridan tashqari, tarafdorlariga surati tushirilgan nonlar tarqatdi.
Zimbabveda prezidentlik saylovlari 2023-yilning 23-avgustida bo‘lib o‘tadi. Prezidentdan tashqari parlament va mahalliy o‘zini o‘zi boshqarish organlari ham saylanadi.
Avvalroq Turkiya prezidenti Rajab Toyyib Erdo‘g‘on saylov uchastkasida ovoz berishdan oldin bolalarga pul tarqatgandi.
Zimbabveda hukumatni tanqid qilish taqiqlangan
Zimbabve yetakchisi Emmerson Mnangagva prezidentlik saylovlari oldidan fuqarolarning hukumatni tanqid qilishiga chek qo‘yuvchi qonunni imzolagandi.
Qonun zimbabveliklar o‘rtasida “vatanparvarlik tuyg‘usini rivojlantirishga qaratilgan” bo‘lib, bunga qarshi bo‘lganlar uchun o‘lim jazosigacha bo‘lgan hukm nazarda tutilgan.
Hukumatni tanqid qilish va uni ag‘darishga chaqirish, shuningdek, harbiy aralashuv, iqtisodiy sanksiyalar va savdo boykotlari uchun mamlakat ichida va tashqarisida mitinglar o‘tkazish taqiqlanadi.
Bunday harakatlar “mamlakat suvereniteti va milliy manfaatlariga qasddan zarar yetkazish” sifatida baholanadi.
Ushbu jinoyatlarni sodir etganlar fuqarolikdan mahrum etilishi, 20 yilgacha qamoqqa olinishi yoki o‘lim jazosiga hukm qilinishi mumkin, garchi oxirgi jazo 20 yil davomida Zimbabveda qo‘llanmagan.
O‘z navbatida, Rossiya prezidenti Vladimir Putin Zimbabve prezidentining mazkur qarori fonida unga vertolyot sovg‘a qilgan.
Izoh (0)