1979-yil 8-avgustda “Paxtakor” Voroshilovgradning “Zarya” jamoasini 3:1 hisobida mag‘lubiyatga uchratadi. Ushbu uchrashuv “Paxtakor”ning o‘sha vaqtdagi tarkibi uchun eng so‘nggi o‘yin bo‘lgani hech kimning xayoliga kelmasdi.
Keyingi uchrashuv 13-avgust kuni Minskning “Dinamo”siga qarshi bo‘lib o‘tishi lozim edi. 11-avgust kuni Ukrainaning Dneprodzerjinsk shahri yaqinida 8400 metr balandlikda Toshkent-Gurev-Donetsk-Minsk yo‘nalishi bo‘yicha uchayotgan Tu-134 hamda shu rusumdagi yana bir samolyot havoda bir-biriga to‘qnashib ketadi.
Fojia natijasida ikki samolyot bortida bo‘lgan 178 kishining barchasi halok bo‘ldi. Ular orasida o‘sha vaqtda o‘zbek futbolining faxri hisoblangan “Paxtakor”ning 17 nafardan iborat tarkibi ham bo‘lgan.
Idgay Tazetdinov (murabbiy)
1933-yil 13-yanvarda tavallud topgan. Faoliyatini Toshkentning “Medik” bolalar jamoasida boshlagan. Undan so‘ng “Trud”da o‘ynagan. 1953—55-yillarda “Spartak”ning ikkinchi jamoasi sharafini himoya qilgan. 1956-yilda “Paxtakor”ga o‘tgan. 4 yil davomida “B” klassda 108 ta o‘yinda maydonga tushgan va 21 ta gol urgan. 1958-yildan boshlab jamoa sardorligi unga topshirilgan.
“A” klassda 1960—1963-yillar davomida 94 ta o‘yinda maydonga tushib, 12 ta gol urgan. 1964—1965-yillarda “Politotdel”ga o‘ynovchi murabbiy bo‘lib o‘tgan. Undan so‘ng “Yangiyer”, “Andijon”, “Yangiariq” jamoalaridan so‘ng 1977-yilda “Paxtakor” murabbiyiga aylangan.
Mixail An (yarim himoyachi)
1952-yil 19-noyabrda tug‘ilgan. Mixail akasi Dmitriy bilan birga Sverdlovdagi yoshlar jamoasi tarbiyalanuvchisi hisoblanadi. 1968-yilda Toshkentdagi sport maktab-internatiga qabul qilinadi. Faoliyatini “Politotdel”da boshlagan futbolchi 1971-yilda “Paxtakor”ga o‘tadi.
An yangi o‘zbek futbolining yorqin futbolchilaridan biri edi. U jamoadoshlari bilan tez til topishar, kuchli va aniq zarbaga ega edi. SSSRning yuqori ligasida 138 o‘yinda maydonga tushib, 30 ta golni o‘z hisobiga yozdirib qo‘ygan. 1974 va 1978-yilda SSSRning eng yaxshi 33 futbolchisi ro‘yxatida uchinchi o‘rinni egallagan.
Yoshlar o‘rtasidagi Yevropa chempionatida (1976) SSSR terma jamoasini sardor sifatida maydonga olib chiqqan. SSSR milliy terma jamoasida esa 2 ta o‘yin o‘tkazgan.
An jarohat olgandi va Minskdagi “Dinamo”ga qarshi o‘yinda ishtirok etmasligi kerak edi. Ammo jamoadoshlari Mixailni o‘zlari bilan birga borishga ko‘ndiradi. 27 yoshli An ham aviahalokat qurboniga aylanadi.
Olim Ashirov (himoyachi)
1955-yil 25-yanvarda Toshkentda tavallud topgan. Ashirov butun faoliyatini “Paxtakor”da o‘tkazgan. Himoya chizig‘ining almashtirib bo‘lmas futbolchisi bo‘lgan. 149 o‘yinda 5 ta gol urishga muvaffaq bo‘lgan 24 yoshli Ashirov ham o‘sha mash’um halokatga uchragan samolyot bortida bo‘lgan.
Ravil Agishev (himoyachi)
1959-yil Buxoroda tug‘ilgan. Ravil bolaligidan futbolga mehr qo‘ygan va Buxoroning “Spartak” jamoasida futbol sirlarini o‘rgana boshlagan. 1978-yilda “Paxtakor” futbolchini o‘z safiga qo‘shib oldi. O‘sha yili Agishev 13 ta o‘yinda maydonga tushdi. Muxlislar himoyachini iliq qabul qildi. Fojiali 1979-yilda esa 14 ta o‘yinda ishtirok etishga ulgurgan Ravil 20 yoshida halok bo‘ldi.
Vladimir Fyodorov (hujumchi)
Vladimir 1955-yil 5-yanvarda Toshkent viloyati O‘rtachirchiq tumanida tavallud topgan. 1972-yildan boshlab “Paxtakor” safida o‘ynashni boshlagan. Fyodorovning Toshkent jamoasi safidagi debyut o‘yini “Zvezda”ga qarshi bo‘lgan. Vladimirning birinchi goli hal qiluvchi rolni bajargan.
1974-yilda SSSRning eng yaxshi hujumchilari ro‘yxatida ikkinchi o‘rinni egallagan. O‘sha yilning 18-oktabrida SSSR terma jamoasi tarkibida birinchi o‘yinini o‘tkazgan. Yevropa chempionatida Irlandiyaga qarshi o‘yinda zaxiradan maydonga tushgan. Umumiy hisobda terma jamoada 18 ta o‘yinda ishtirok etgan. 25 yoshida aviahalokat qurboniga aylandi.
Konstantin Bakanov (yarim himoyachi)
1954-yil 25-mayda Toshkentda tavallud topgan. 1966-yilda Toshkentdagi zilziladan so‘ng oilasi bilan Moskvaga ko‘chib ketadi. Moskvaning “Dinamo” jamoasi maktabiga borishdan bosh tortadi va 1971-yilda “Paxtakor”ning ikkinchi jamoasiga qabul qilinadi. 1972-yilda birinchi ligada 2 ta o‘yin o‘tkazadi va og‘ir jarohat oladi. 1973—1975-yillar davomida maydonga tusha olmaydi.
1976 va 1977-yillarda 72 ta o‘yinda ishtirok etib, 17 ta gol uradi. Yuqori ligada esa 1978—1979-yillar mobaynida harakat qilib, 42 ta o‘yinda 7 ta golni o‘z hisobiga yozdirib qo‘yadi. O‘sha vaqtda unga Moskvaning “SSKA” jamoasi taklif kelib tushgandi. Bakanov 25 yoshida fojiali o‘lim topadi.
Yuriy Zagumennix (himoyachi)
1947-yil 7-iyunda tug‘ilgan. Faoliyatini Vladivostokning “Luch” jamoasida boshlagan. 1970-yilda “Zenit” futbolchini o‘z jamoasiga taklif qilgan. 1975-yilda mashg‘ulotlar vaqtida og‘ir jarohat oladi va operatsiya qilinadi. Bir yarim yil davomida futbol bilan shug‘ullana olmagan Yuriy 1977-yilda katta futbolga qaytadi. Ammo “Zenit” futbolchiga chiqish eshiklarini ko‘rsatadi. Zagumennix “Paxtakor”ga o‘tadi. Yuriy Toshkent jamoasi safida asosiy futbolchilardan biriga aylanadi. Yuriy Zagumennix “Zenit” tarixidagi eng yaxshi 55 futbolchi ro‘yxatidan o‘rin olgan.
Halokat sodir bo‘lgan pallada Zagumennix 32 yoshda edi.
Aleksandr Korchyonov (yarim himoyachi)
1949-yil 4-avgustda Qozon shahrida tavallud topgan. 1972-yilda Vyacheslav Solovyov Aleksandrni “Paxtakor”ga taklif qiladi. Korchyonov jamoaning almashtirib bo‘lmas futbolchisiga aylanadi. 1977-yilda sardorlik bog‘ichi unga topshiriladi. Yuqori ligada (1973—1975, 1978—1979) 126 ta o‘yinda ishtirok etib, 3 ta gol urgan. Birinchi ligada esa (1976—1977) 70 o‘yinda 9 ta gol urishga muvaffaq bo‘lgan. Korchyonov 30 yoshida halok bo‘ldi.
Nikolay Kulikov (himoyachi)
1953-yil 25-aprelda Moskvada tug‘ilgan. 12 yoshida Moskvaning “Dinamo” jamoasi tayyorlov guruhiga qabul qilingan. 1974-yilda esa Xorazmning “Xonqa” jamoasi futbolchini o‘z safiga qo‘shib oladi. U yerda 2 mavsum o‘ynagach, 1976-yilda “Yangiyer” jamoasiga o‘tadi. Bir yildan keyin “Paxtakor” himoyachini xarid qiladi. Kulikov “Paxtakor”da 21 o‘yinda maydonga tushadi va muxlislarning sevimli futbolchisidan biriga aylanadi.
Nikolay samolyotda halok bo‘lgan vaqtda 26 yoshda edi.
Vladimir Makarov (yarim himoyachi)
1947-yil 9-mart kuni Tojikistonning Stalinobod shahrida (hozirgi Dushanbe) tavallud topgan. 10 yoshidan futbol bilan shug‘ullana boshlagan. Professional faoliyatini 1966-yil Dushanbening “Energetik” jamoasida boshlagan. 1974-yilda esa Odessaning “Chernomorets” jamoasiga o‘tadi. Birinchi yil 30 o‘yinda 13 ta gol urgan Vladimir jamoaning to‘purariga aylanadi.
Keyingi mavsumlarda ham ishonchli harakat qilgan Makarov “Paxtakor”ning qiziqishlar doirasiga tushib qoladi. Toshkent jamoasiga o‘tgan futbolchi 1978-yilda chempionatda 5 ta gol uradi. 1979-yilgi mavsumda esa 14 ta o‘yinda ishtirok etgan 32 yoshli Makarovga Minskda bo‘lib o‘tishi ko‘zda tutilgan 15-o‘yinni o‘tkazish nasib etmaydi.
Sergey Pokatilov (darvozabon)
1950-yil 30-dekabrda Ashxobodda tavallud topgan. 18 yoshida “Stroitel” jamoasiga qabul qilinadi va u yerda 5 mavsum faoliyat olib boradi. 1973-yilda Pokatilov “Paxtakor”ga taklif etiladi. Yangi jamoasida Sergey darhol asosiy darvozabonga aylanadi. 1975-yilda esa jarohat olib safdan chiqadi. Uzoq vaqt davomida jarohatini davolaydi. Jarohatidan tuzalgan Pokatilov “Dinamo”ga qarshi o‘yinda jamoaning asosiy darvozaboni sifatida Minskka borayotgan edi. Pokatilov o‘sha vaqtda 30 yoshda edi.
Viktor Churkin (hujumchi)
1952-yil 25-yanvarda Qozog‘istonning Chimkent shahrida tug‘ilgan. 1968—1970-yillar mobaynida Chimkentning “Metallurg” jamoasida o‘ynagan. 1971—1975-yilda “SKA” jamoasi sharafini himoya qiladi. 1976-yilda esa “Paxtakor” safiga qo‘shiladi. 27 yoshli Churkin ham halok bo‘lgan samolyot ichida bo‘lgan.
Sirojiddin Bozorov (hujumchi)
1961-yilda Samarqand viloyati Narpay tumanida tug‘ilgan. 1972-yil Respublika sport-internatiga o‘qishga kiradi. Ikki yildan so‘ng O‘zbekiston yoshlar terma jamoasi safiga chaqirilgan. Internatning 10-sinfida o‘qib yurgan vaqtlarida “Paxtakor”ning o‘rinbosarlar jamoasi tarkibida o‘ynagan. 1978-yil sobiq Ittifoq yoshlar Spartakiadasida O‘zbekiston yoshlar termasi tarkibida kumush medalga sazovor bo‘lgan.
Sirojiddin aviahalokatda dunyodan ko‘z yumgan futbolchilar ichida eng kichigi edi. 10-avgust kuni 19 yoshni qarshi olgan Sirojiddin Minskka borishni xohlamaganini ko‘pchilik aytadi. Ammo asosiy jamoada jarohatlanganlar ko‘pchiligi uchun Sirojiddin ham maydonga tushishi mumkinligi sabab tarkibga kiritiladi. Asosiy tarkibda birorta o‘yin o‘tkazmagan Bozorov halokat qurboniga aylanadi.
Shuhrat Eshbo‘tayev (hujumchi)
1959-yil 8-fevralda tavallud topgan. Shuhrat Navoiy maktabi tarbiyalanuvchisi. 1978-yilda “Paxtakor” e’tiborini tortgan futbolchi o‘rinbosarlar jamoasiga qabul qilinadi. Ilk mavsumida 6 ta gol urgandi. 1979-yilda “Paxtakor”ning asosiy tarkibiga jalb etiladi.
Debyut o‘yinida Yuriy Zagumennix o‘rniga maydonga tushgan Eshbo‘tayev oradan 20 daqiqa o‘tib gol uradi. Bosh murabbiy Oleg Bazilevich Shuhratni keyingi o‘yinlarda asosiy tarkibda tushira boshlaydi. Shuhrat Eshbo‘tayevning “Paxtakor” safidagi oxirgi o‘yini “Zarya”ga qarshi bo‘lib qoldi. 20 yoshli Eshbo‘tayev ham aviahalokat qurboniga aylandi.
Vladimir Sobirov (hujumchi)
1958-yil 14-yanvarda Buxoroda tavallud topgan. “Paxtakor” sport maktabida tahsil olgan. 1977-yilda Xorazmning “Xonqa” jamoasida ham o‘ynashga ulgurgan Vladimir 1979-yildagina “Paxtakor” asosiy tarkibidan joy ola boshlaydi. Bosh murabbiy Oleg Bazilevich futbolchiga maydonda o‘zini ko‘rsatish uchun imkoniyat beradi. Afsuski, o‘sha yili 21 yoshli Sobirov ham boshqa jamoadoshlari singari hayotdan ko‘z yumadi.
Futbolchilar va murabbiydan tashqari shifokor Vladimir Chumakov (1932—1979) va ma’mur Mansur Tolibjonov (1944—1979) ham bo‘lgan. Ular ham aviahalokat natijasida vafot etgan.
Tez fursat ichida Toshkentga boshqa klublardan futbolchilar chaqirildi va jamoa mavsumni davom ettirdi. Uch mavsum mobaynida jamoaga oliy ligadan tushib ketmaslik imkoniyati taqdim etildi. Lekin hayotdan ko‘z yumgan butun bir jamoa o‘rnini hech kim va hech narsa bosa olmasdi.
O‘sha mash’um halokat tufayli ko‘p ming sonli ishqibozlar futboldan butunlay ko‘ngil uzdi. “Paxtakorchilar”ning oila a’zolariga qanchalik qiyin bo‘lganligini tasavvur qilish mushkul bo‘lmasa kerak. Navbatdagi uchrashuvlarga tashrif buyurgan muxlislar ko‘zlarida yosh bilan yangi jamoa ishtirokidagi o‘yinni kuzatib borardi...
Bugun aviahalokatga 44 yil to‘ldi. Shuncha vaqt o‘tsa ham “paxtakorchilar” muxlislar qalbida, xotirasida qolmoqda.
Izoh (0)