Rossiya va Ukraina o‘rtasida keng ko‘lamli urush boshlanganidan keyin Vashington Kiyevni qo‘llab-quvvatlash uchun 66 milliard dollardan ortiq mablag‘ yubordi. Shundan 43 milliardi harbiy yordamga, 20,5 milliardi iqtisodiy yordamga va 2,6 milliardi gumanitar yordamga to‘g‘ri keldi, deb yozmoqda The Washington Post.
Nashr bilan suhbatlashgan ekspertlarning aytishicha, bu summa AQSHning Ikkinchi jahon urushidan buyon birorta davlatga ko‘rsatgan eng katta ko‘magidir.
Pentagonning 2023-yilgi mudofaa budjeti 1,77 trillion dollar bo‘lgan bir paytda, 66 milliard dollar kichik miqdor ko‘rinsa-da, AQSHning boshqa mamlakatlarni qo‘llab-quvvatlashi bilan solishtirganda, bu juda katta mablag‘. Masalan, 2022—2023-yillarda Isroil AQSHdan 8,6 miliard dollar olgan.
Mutlaq ma’noda, AQSH urush boshlanganidan beri Ukrainaning eng katta donori bo‘ldi. Ammo agar turli mamlakatlarning Ukrainani qo‘llab-quvvatlash miqdori ularning yalpi ichki mahsulotidagi ulushi bo‘yicha taqqoslansa Qo‘shma Shtatlar 12-o‘rinda turadi. Bu borada Boltiqbo‘yi mamlakatlari yetakchi: masalan, Estoniyaning Ukrainaga yordami mamlakat yalpi ichki mahsulotning 1,26 foiziga teng.
Izoh (0)