Bolgariya hukumati mamlakat Ichki ishlar vazirligi va Ukraina Mudofaa vazirligi o‘rtasida zirhli transport vositalarini yetkazib berish bo‘yicha kelishuv loyihasini ma’qulladi. Bu haqda Bolgariyaning BTA agentligi xabar bermoqda.
Bolgariya ichki ishlar vaziri Kalin Stoyanovga muzokaralar olib borish va tegishli hujjatni imzolash topshirildi.
BTA aniqlik kiritishicha, gap hozirda Ichki ishlar vazirligi foydalanmayotgan zirhli transport vositalarini yetkazib berish haqida bormoqda. Zaxirada turgan bronetransportyorlar soni 100 ga yaqin.
Agentlik ma’lumotlariga ko‘ra, kelishuvlarga Ukraina prezidenti Vladimir Zelenskiyning iyul oyida Bolgariyaga tashrifi chog‘ida erishilgan.
BTA qayd etishicha, Ukrainaga topshiriladigan zirhli mashinalar Bolgariya Ichki ishlar vazirligi ehtiyojlari uchun eskirgan deb topilgan. Bundan tashqari, so‘nggi 25 yil ichida ularni saqlash budjetdan katta moliyaviy xarajatlarni talab qilgan.
Iyun oyi oxirida Bolgariya mudofaa vaziri Todor Tagarev mamlakat Yevropa Ittifoqining Kiyevni qurol-yarog‘ bilan ta’minlash tashabbusiga qo‘shilishni rejalashtirayotganini aytdi. Ushbu kelishuv doirasida mamlakatlar Ukrainaga jo‘natish yoki zaxiralarini to‘ldirish uchun birgalikda o‘q-dorilarni sotib oladi. Bungacha mamlakat Kiyevga tog‘ridan-to‘g‘ri qurol yetkazib bermagan edi.
Izoh (0)