Kanada bosh vaziri Jastin Tryudo va uning rafiqasi Sofi 18 yillik turmushidan so‘ng ajrashayotganini ma’lum qildi.
Kanada hukumati rahbarining Instagram sahifasida joylangan postda aytilishicha, juftlik “juda ko‘p mazmunli va og‘ir suhbatlardan so‘ng” ajralishga qaror qilgan.
“Biz har doimgidek, bir-birimizga, biz qurgan va qurishda davom etadigan barcha narsalarga chuqur muhabbat va hurmat ko‘rsatuvchi yaqin oila bo‘lib qolamiz”, — deyiladi postda.
Tryudo idorasi bayonotida aytilishicha, ajrashish to‘g‘risidagi bitim imzolanganiga qaramay, sobiq er-xotin ommaviy tadbirlarda birga chiqadi.
Jastin va Sofi Tryudo 2005-yilda turmush qurgan. O‘n yil o‘tgach, Tryudo Kanada bosh vaziri bo‘ldi. Juftlikning uch nafar farzandi bor: 15 yoshli o‘g‘li Ksavye, 14 yoshli qizi Ella-Jeyms va to‘qqiz yoshli o‘g‘li Adrian.
Reuters agentligiga ko‘ra, Tryudoning ajrashishida “og‘riqli tarixiy o‘xshashlik” bor. Jastinning otasi Per Tryudo ham 1977-yilda Kanada bosh vaziri bo‘lganida rafiqasi Margaret bilan ajrashgan. Jastin Tryudo o‘shanda olti yoshda edi.
Izoh (0)