Samarqanddagi suv omborida to‘rt nafar yigitning suvga cho‘kib vafot etgani haqida xabar berilgandi. “Daryo” muxbiri bilan suhbatlashgan voqea guvohining aytishicha, yigitlar mast holda bo‘lgan.
Taʼkidlanishicha, vafot etgan to‘rt nafar yigitning ikki nafari Samarqand viloyati Past Darg‘om tumanidagi tibbiyot texnikumida o‘qigan.
“Marhumlarning ikki nafari texnikum talabasi edi. Qolgan ikki nafari ham shu texnikumda o‘qib ketgandi. Ular o‘sha kuni dam olishga chiqqan. Menga ham ertalab telefon qilib, taklif qilishgandi. O‘sha kuni ishlarim borligi sabab, voqea joyiga soat 15:00 larda bordim. Yigitlarning cho‘kib ketishi taxminan 14:30 larda sodir bo‘lgan. Boisi, men voqea joyiga borganimda, yarim soat oldin shu voqea sodir bo‘ldi deyishgandi”, — deydi Past Darg‘om tibbiyot texnikumi o‘qituvchisi.
O‘qituvchining qo‘shimcha qilishicha, voqea joyiga yetib borganida u yerdagilar Orzimurod ismli bola bir kishini qutqargani haqida gapirib berishgan.
“Ular qayiqqa chiqib, ancha uzoqqa suzib borishgan. Borgan joyda suv o‘tlari bo‘lgan. Suvga tushishgan paytda suv o‘tlari bor joy bo‘lgani uchun, chiqib ketisholmagan. Lekin Orzimurod ismli bola bir kishini suvdan olib chiqqan. Uni suvdan olib chiqishganida spirtli ichimlik hidi anqib turgan bo‘lgan. Hozirda uning ahvoli yaxshi”, — deydi suhbatdosh.
Bosh prokuraturaga ko‘ra, hozirda qidiruv-qutqaruv ishlari olib borilmoqda. Holat yuzasidan tuman prokuraturasi tomonidan tergovga qadar tekshiruv harakatlari boshlangan. Olib borilgan qutqaruv ishlari davomida bir kishi — 21 yoshli O.E.ning murdasi topilgan.
Izoh (0)