Toshkent viloyatining Angren shahridagi avtomobil yo‘lida transport qatnovini to‘xtatib, “hokim, hokim”, deb baqirgan qizlar videosi tarqaldi. Angren shahar hokimligi axborot xizmati mazkur voqeaga izoh berdi.
Joriy yil 10-iyul kuni “Sungreen tex” chet el korxonasi ishchi xodimlarining bir guruhi korxona rahbariyatining besh kunlik ish haftasini olti kunlikka o‘tkazish tartibidan norozi bo‘lib, Ohangaron ko‘chasida yo‘lni to‘sgan. Voqeadan xabar topgan shahar hokimi boshchiligida sektor rahbarlari va mutasaddilar voqea joyiga yetib borib, ishchi xodimlar eʼtirozini tinglab, korxona rahbariyatiga murojaat qilgan. Shahar hokimi boshchiligidagi sektor rahbarlari hamda korxona maʼmuriyati o‘rtasida bo‘lib o‘tgan o‘zaro muloqotdan so‘ng, muammo ishchi xodimlar foydasiga hal bo‘lgan, — deyiladi hokimlik izohida.
Hokimlikning “Daryo”ga qo‘shimcha qilishicha, korxona rahbariyati ishchilari belgilangan ish rejani bajarishga ulgurmagani uchun, ishchilariga olti kun ishlashni taklif qilgan.
Bu korxona ishlari soatbay asosida ishlashar ekan. Bir kunda 80 ta tayyor kiyim tikish rejasi belgilangan bo‘lsa-da, ishchilar 40 ta tikishgan. Yaʼni belgilangan reja bajarilmagach, rahbariyat ish kunini ko‘paytirib, ularning natijasini yaxshilashni maqsad qilgan. Ammo bu taklifni baʼzi ishchilar noto‘g‘ri talqin qilib, barchani ko‘chaga olib chiqqan. Hamda hokimlikka borishga chorlagan. Aslida korxona rahbariyati olti kunlik ish kuni bo‘lsa, maoshni ham shunga yarasha to‘laymiz degan. Lekin ishchilar shanba kuni bolalarimizni qayerga qo‘yamiz deb bunga norozi bo‘lgan, — deydi hokimlik axborot xizmati rahbari Gulshoda Shahanova.
Maʼlumot berilishicha, bugungi kunda korxonada 747 nafar ishchi xodim, besh kunlik ish haftasi tartibida faoliyat yuritmoqda.
Izoh (0)