“Yaponiyada bandlik imkoniyatlaridan foydalangan holda O‘zbekistonning sanoat sohasida kadrlar salohiyatini rivojlantirish” loyihasini amalga oshirish bo‘yicha bitim imzolandi, deb xabar bermoqda Kambag‘allikni qisqartirish va bandlik vazirligi.
Ma’lum qilinishicha, O‘zbekiston bosh vaziri o‘rinbosari rahbarligidagi hukumat delegatsiyasi JICA tashkilotining Tokiodagi bosh ofisida ikki tomonlama hamkorlikni yangi bosqichga olib chiqish bo‘yicha muzokaralar o‘tkazdi.
Uchrashuv davomida O‘zbekistonda JICA tashabbusi bilan 3 yilga mo‘ljallangan “Yaponiyada bandlik imkoniyatlaridan foydalangan holda O‘zbekistonning sanoat sohasida kadrlar salohiyatini rivojlantirish” loyihasini amalga oshirish bo‘yicha bitim imzolandi.
Loyihaga ko‘ra, Yaponiyada ishlash istagida bo‘lgan fuqarolarni barcha soha va yo‘nalishlarda ishga joylashishga ko‘maklashiladi.
Qishloq xo‘jaligi, keksalarni parvarishlash, mehmonxona xo‘jaligi, umumiy ovqatlanish sohalarida ishlash tartib qoidalari to‘g‘risida ma’lumotlarni aks ettiruvchi veb-portal joriy qilinadi. Mazkur veb-portalda Yaponiyadagi potensial ish beruvchilar uchun O‘zbekistonning mehnat salohiyati, fuqarolarni mehnat migratsiyasiga tashkiliy, qonuniy va xavfsiz jalb qilish uchun yaratilgan tizim va infratuzilma haqida ma’lumotlar joylashtiriladi.
Shuningdek, loyiha doirasida Yapon tili va kasbga o‘qitish kurslarini zamonaviy uslubiy qo‘llanmalar bilan jihozlashda ko‘maklashiladi.
Izoh (0)