O‘zbekistonda 2023/2024-o‘quv yili uchun OTMga kirish test sinovlari respublika bo‘yicha 72 ta binoda bo‘lib o‘tadi.
Ma’lum qilinishicha, bir smenada 1 274 ta guruhda 38 220 nafar, bir kunda (ikki smenada) 2 548 ta guruhda 76 440 nafar abituriyent test sinovida ishtirok etadi.
Test sinovlari barcha hududlarda 1-avgust kuni boshlanib, hududlardagi abituriyentlar soni va binolar sig‘imidan kelib chiqqan holda 11 kundan 13 kungacha davom etadi.
2023/2024-o‘quv yili uchun OTMlarning bakalavriat taʼlim yo‘nalishlari uchun ro‘yxatdan o‘tgan 1 018 007 nafar abituriyentlarning 948 486 nafari test sinovlarida ishtirok etishi belgilangan.
28-iyuldan abituriyentlarga ruxsatnomalarni berish boshlangan. Abituriyentlar test sinovlarida ishtirok etish uchun “Abituriyent ruxsatnomasi”ni “My.uzbmb.uz” saytiga shaxsiy identifikatsiya raqami hamda pasport seriyasi va raqamini kiritgan holda olishlari mumkin.
Stadionlarda o‘tkazilgan test sinovlari
2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari ochiq maydonlarda tashkil etilgandi. Shu sababli o‘shanda abituriyentlar xohishiga ko‘ra test sinovlariga bosh kiyim (kepka) bilan kelishlari mumkinligini bildirilgan. 2-sentabrda Farg‘onada imtihonga kelgan abituriyentlarga do‘ppi tarqatilgandi.
2021-yilning avgust oyi boshida O‘zbekiston Davlat test markazining rasmiy veb-saytiga 2021/2022-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari o‘tkaziladigan stadion va xiyobonlar bo‘yicha ma’lumotlar e’lon qilingandi. Xususan, Toshkent shahrida OTMlarga kirish imtihonlari “Paxtakor” va “Bunyodkor” stadionlari, shuningdek, “G‘alaba” va “Botanika” bog‘larida bo‘lib o‘tgandi. 2022-yilda ham OTMlarga kirish imtihonlari ochiq havoda o‘tkazildi.
Izoh (0)