Nima uchun jazirama issiqda tez och qolamiz?

Ko′pchilik yozda ko‘proq vaqtimizni tashqarida o‘tkazib, og‘ir ovqatlarni kamroq iste’mol qilganimiz hisobiga hammamiz ozamiz, deb o‘ylaydi. Ratsionimizda sarxil meva va sabzavotlar paydo bo‘ladi, ayniqsa, jazirama kunlarda ovqat o‘rniga muzdek ichimliklar ichishni yaxshi ko‘ramiz. Bunday havoda tarvuz va qovun ham yaxshi ketadi. 

Biroq ayrim insonlar aksincha, issiqda ishtaha ochilishini kuzatadi.

Issiqda metabolizm tezlashgani hisobiga ovqatlanish istagi paydo bo‘lishi mumkin. Ko‘p terlash va termomuvozanat bilan hisoblashishga urinayotgan organizm ko‘p kaloriya sarflaydi, bu esa nimadir yeyish istagini uyg‘otadi. 

Mutaxassislar esa, issiqda kuchayayotgan ishtaha o‘z organizmi ehtiyojlarini tushunmaslik oqibatida kelib chiqishini ta’kidlamoqda. Aksariyat insonlar ochlik va tashnalikni adashtirib yuboradi. Buning oqibatida esa balansni noto‘g‘ri yo‘l bilan qayta tiklashga urinadi. 

Agar jazirama issiqda o‘zingizni och qolgandek his qilsangiz, bir-ikki stakan xona haroratidagi suv ichib ko‘ring. Agar suv ichib bo‘lganingizdan 15 daqiqa keyin ham nimadir yegingiz kelsa, taom tanovul qilishingiz mumkin.