Atom energiyasi bo‘yicha xalqaro agentlik (MAGATE) ekspertlari rossiyalik harbiylar tomonidan egallab turilgan Zaporojye atom elektr stansiyasi yaqinida portlashlarni qayd etdi. Bu haqda Ukraina yadroviy tartibga solish davlat inspeksiyasi rahbari Oleg Korikov ma’lum qildi.
Uning so‘zlariga ko‘ra, Zaporojye AESda doimiy bo‘lib turgan MAGATE vakillari 26 va 27-iyul kunlari portlashlarni qayd etgan.
Avvalroq MAGATE matbuot xizmati tashkilot mutaxassislari 23-iyul kuni ZAESni tekshirish chog‘ida stansiyaning ichki va tashqi perimetrlari orasidagi bufer zonada joylashgan bir nechta minalarni ko‘rgani haqida xabar bergandi. Minalar stansiya xodimlari kira olmaydigan yopiq hududda joylashgan.
Rossiya Ukrainaga qarshi urushning dastlabki kunlarida ZAESni egallab olgandi. 2023-yil iyul oyi boshida Ukraina hukumati Rossiya kuchlari AESda provokatsiya tayyorlayotganini eʼlon qildi. Rossiya tomoni, o‘z navbatida, Ukraina qo‘shinlari 5-iyulga o‘tar kechasi stansiyaga hujum qilishga hozirlik ko‘rayotganini daʼvo qildi. Ko‘rsatilgan vaqtda AESda hech qanday hodisa qayd etilmagan, AESning sun’iy yo‘ldoshdan olingan suratlarida 4-energoblok tomida 5-iyulga o‘tar kechasi paydo bo‘lgan noma’lum obyektlar ko‘rindi.
24-iyul kuni ZAESning 4-energobloki avariyaga olib keluvchi “qaynoq o‘chirish” holatiga o‘tgani ma’lum bo‘ldi. Ukrainaning “Energoatom” davlat kompaniyasi hodisani “ushbu yadroviy inshootni ishlatish litsenziyasi talablarini qo‘pol ravishda buzish” deb atadi, shuningdek, MAGATEni Rossiya harbiylariga ta’sir o‘tkazuvchi choralarni ko‘rishga chaqirdi.
Izoh (0)