Jinoyat ishlari bo‘yicha Olmaliq shahar sudida may oyida ikki nafar o‘quvchi qizni urib yuborgan Damas haydovchisiga hukm o‘qildi. Bu haqda “Olmaliq ishchisi” gazetasi xabar berdi.
15-may kuni 2004-yilda tug‘ilgan haydovchi S.X. boshqaruvidagi Damas avtomashinasida shaharning 21-maktab qarshisidagi piyodalar yo‘lakchasidan o‘tayotgan 14 yoshli ikki nafar o‘quvchi qizni urib yuborib, yo‘l-transport hodisasi sodir etgandi.
Toshkent viloyati IIBB matbuot xizmatining xabar qilishicha, 24-may kuni mashina urib yuborgan qizlardan biri — 2009-yilda tug‘ilgan M.Y. olib borilgan tibbiy muolajalarga qaramay, shifoxonada vafot etgan.
“Sud-avtotexnika ekspertizasi xulosasiga ko‘ra, Damas avtomobili haydovchisi Yo‘l harakati qoidalariga, xususan, svetofor, yo‘l belgilari va chiziqlari signallariga rioya qilganida, yo‘l-transport hodisasining oldini olish uchun texnik imkoniyatga ega bo‘lgan”, — deb yozadi gazeta.
Sudda sudlanuvchi o‘z aybiga to‘liq iqror bo‘lgan. Uning aybi jabrlanuvchi, qonuniy vakillari ko‘rsatmalari, o‘z aybiga iqror bo‘lishlari, videomateriallar, sud-tibbiyot va sud avtotexnika ekspertizalarining xulosalari bilan tasdiqlangan.
Sud hukmiga ko‘ra, ayblanuvchi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismida nazarda tutilgan jinoyatni sodir etganlikda aybdor deb topildi. Unga nisbatan 2 yil muddatga transport vositalarini boshqarish huquqini cheklagan holda 6 yil muddatga manzil-koloniyada ozodlikdan mahrum qilish jazosi tayinlandi.
Izoh (0)