Twitter nomi X ga o‘zgartirilganidan keyin ijtimoiy tarmoq egasi Ilon Mask ushbu platforma dunyodagi eng qimmat brendga aylanishini aytdi.

Bu haqda Mask ijtimoiy tarmoqda mutaxassisning Twitter nomi o‘zgarishi 40 milliard dollardan ko‘proqqa tushishi haqidagi so‘zlariga javoban yozdi.

“X Yer yuzidagi eng qimmat brend bo‘ladi. Gaplarimni eslab qoling”, — deb javob berdi Mask.

Ilon Maskning so‘zlariga ko‘ra, bundan buyon X platformasidagi postlar “tvit” emas, balki “iks” deb nomlanadi.

Mask tez orada ijtimoiy tarmoqqa murakkab kommunikatsiyalar va “barcha moliyaviy operatsiyalardan foydalanish imkoniyatini” joriy qilishni va’da bermoqda. Shuningdek, u kelajakda hamma narsa uchun mo‘ljallangan X deb nomlanuvchi yangi ilovani taqdim qilmoqchi. 

24-iyul kuni Twitter o‘z logotipini ko‘k qushdan X harfi tasvirlangan belgiga o‘zgartirdi. Mask Twitter nomini X deb o‘zgartirish rejalari haqida 1-iyun kuni gapirgandi. U kelajakda ijtimoiy tarmoqning funksional imkoniyatlari kengayishi, shu sababli Twitter brendi bunga mos tushmasligini aytgan. Shuningdek, u yangilanadigan platformada eski Twitter’ga qaraganda uzunroq postlar, videolar chop etish, xabarlar almashish va moliyaviy xizmatlardan foydalanish imkoni bo‘lishini ma’lum qilgan.