Buyuk Britaniyada 11 yoshli Adrian Li aqliy qobiliyat darajasi (IQ)ni belgilab beruvchi testda Hoking va Eynshteynni ortda qoldirib, eng yuqori natijani qayd etdi. Bu haqda Mirror xabar berdi.
Mashhur daholar 160 ball olgan, Adrian Li esa Mensa IQ testida 162 ballni qo‘lga kiritgan. Natijada Adrianga Mensa jamiyatiga (yuqori IQ’ga ega odamlar jamiyati) a’zo bo‘lish taklif qilingan.
Londonning Barnet shahrida yashovchi Adrian Gonkongdan ko‘chib kelgan. Onasi Reychel o‘g‘li “bolaligidanoq unda farqli belgilarni” kuzatgan. Adrian “universitet” so‘zini atigi ikki yoshida mukammal talaffuz bilan o‘qiy olgan, garchi u bu so‘z nimani anglatishini bilmagan.
Reychel ikki yoshidan kitobga ishtiyoqi oshgan o‘g‘li har kuni bir nechta kitob o‘qishini aytdi.
Bolalar bog‘chasida u “Yulduzlar urushi” kitobining to‘liq matnli versiyasini o‘qiy boshladi. Adrian hatto sakkiz yoshida romanlar yozishni boshlagan, u hayajonli sarguzasht hikoyalarini “Monster Quest” turkumi deb atagan. Hozirda u o‘smirlar uchun Qadimgi Rim haqida roman yozmoqda, umid qilamanki, u kuzgacha nashr etiladi, — deydi bolaning onasi.
Uning qo‘shimcha qilishicha, Adrian boshlang‘ich maktabda bir nechta akademik mukofotlarga sazovor bo‘lgan va test, imtihonlarni yaxshi ko‘radi.
Sentabr oyida bola Barnetdagi Qirolicha Yelizaveta maktabiga o‘qishga kirmoqchi va u yerda xuddi shunday iste’dodli bolalar bilan tanishishga umid qilmoqda. Akademik muvaffaqiyatdan tashqari, Adrian shaxmat, qilichbozlik, chang‘i, stol tennisi, taekvondo, eshkak eshish va boshqalarni yaxshi ko‘radi.
Avvaliga Mensa IQ jamiyatiga qo‘shilish uchun 148 ball olish haqida o‘yladim. Eynshteyn ega bo'lgan 160 ballga yaqinlasha olaman deb hech qachon o‘ylamagandim. Bu men uchun juda hayratlanarli va ta’sirli edi. Balki bir kun kelib kardiolog bo‘lish, Kembrij diplomini olish va dunyodagi eng yaxshi shifokor bo‘lish orzumni amalga oshiraman! — dedi bolaning o‘zi.
Izoh (0)