Qamchiq dovonidagi tunnel devoriga urilgan Isuzu’da yong‘in chiqdi (video)

Toshkent—O‘sh avtomobil yo‘lidagi tunnelda devorga urilgan yuk mashinasida yong‘in chiqdi, deb xabar beradi FVV matbuot xizmati.

Ma’lum qilinishicha, 22-iyul kuni soat 03:20 da A-373 “Rezak” tunnelida Vodiy—Toshkent yo‘nalishida harakatlanib ketayotgan Isuzu rusumli yuk avtomobili haydovchisi boshqaruvni yo‘qotib, tunnel devoriga urilishi oqibatida yong‘in kelib chiqqan. 

Hodisa tunnelga biriktirilgan mas’ul xodimlar tomonidan aniqlanib, zudlik bilan “Qamchiq” dovonidagi FVV qutqaruvchilarining 13 nafari, 2 ta yong‘in-qutqaruv ekipaji va Qutqaruv otryadidan 1 ta texnika voqea joyiga yetib borgan. Yong‘in besh daqiqa ichida o‘chirilgan. Shundan so‘ng soat 03:50 da yuk avtomobili tunneldan olib chiqilib, sovitish ishlari o‘tkazilgan.

Isuzu avtomobili yukxonasidagi jami 4,2 tonna yukning 95 foiz mahsuloti yong‘indan saqlab qolingan. Sodir bo‘lgan yong‘in oqibatida tan jarohati olgan va halok bo‘lganlar yo‘q.

Transport vositalarining yonib ketish holatlari

Aprel boshlarida Samarqandda yonilg‘i sig‘imi 20 tonna bo‘lgan yuk mashinasi yonib ketgani, Andijonda yo‘l chetida turgan Nexia’da yong‘in chiqqani, Qamchiq dovonida lak-bo‘yoq ortilgan yuk mashinasi yonib ketishi oqibatida bir necha kishi jabrlangani to‘g‘risida xabar berilgandi. Shuningdek, Qashqadaryoda Damas bilan to‘qnashgan Captiva yonib ketgandi.