O‘zbekiston avtomobil ishlab chiqarish sanoatida 2023-yilning yanvar—iyun oylarida 49 458 dona Cobalt ishlab chiqarilgan. Bu haqda Statistika agentligi xabar berdi.
Maʼlumotlarga ko‘ra, avtomobil ishlab chiqarish sanoatida 2023-yilning yanvar—iyun oylarida ishlab chiqarilgan yengil avtomobillar soni:
- Cobalt – 49 458 dona;
- Lacetti-Gentra – 37 084 dona;
- Damas – 34 944 dona;
- Tracker – 15 071 dona;
- Onix – 11 222 dona;
- Nexia T-250 – 2 056 dona;
- Maxsus yengil avtomobillar – 11 775 dona.
UzAuto Motors 2022-yil 17-dekabrda Cobalt, Lacetti, Damas avtomobillari sotuvini to‘xtatgan. Kompaniya 2023-yildan Spark va Nexia o‘rniga Tracker va Onix ishlab chiqarishini maʼlum qilgan. Hozirda Tracker va Onix sotuvda mavjud. Ammo narxi 200 million so‘mdan yuqori bo‘lgan bu avtomobillar uchun navbat katta bo‘lib, to‘lov qilgan mijoz mashinasini olishni 1–1,5 yil kutishiga to‘g‘ri keladi.
UzAuto Motors vakili “Daryo” muxbiri bilan suhbatda ishlab chiqarilayotgan, ammo sotuvda mavjud bo‘lmagan mazkur avtomobillar qayerga “ketayotgani” to‘g‘risida maʼlumot bergandi. “Ishlab chiqarilayotgan avtomobillar eski tuzilgan shartnomalar bo‘yicha yetkazib berilmoqda. Navbatlar kamaygach, sotuv shartnomalari qayta tiklanadi”, — deya maʼlum qilgan manba.
Kompaniya iyul oyi boshida Asakadagi zavodda modernizatsiya boshlangani sabab avtomobil ishlab chiqarish vaqtincha to‘xtatilishini eʼlon qilgandi. Keyinroq kompaniya vakili zavod faoliyati 17-iyul (dushanba) kunidan boshlanishini aytgan. UzAutoMotors vakillariga ko‘ra, endilikda Cobalt avtomobili eng ko‘p miqdorda, undan keyingi o‘rinda Damas ishlab chiqariladi.
Izoh (1)
Булиши мумкин эмас. Ноябрь ойини уртасида шартнома тузганмиз Кобальт учун. Навбатни хар куни кузатиб бораман онлайн, бир кунда бор йуги 3-4 та камаяди. 6 ойда 6-7 минг донага камайди халос. Сал кам 50 минг машина каерга кетти. Хаммаси ташки бозорга сотиляпти эшитишим буйича.