Rossiyalik Mixail Raduga drel yordamida “aniq tushlar” ko‘rishi uchun o‘zining miyasiga implant o‘rnatdi. Bu haqda “Gazeta.ru” xabar berdi.
40 yoshli erkak yaqinda Rossiyadan Olmaotaga ko‘chib o‘tgan. Qozog‘istonda u uzoq vaqtdan beri rejalashtirilgan operatsiyani o‘tkazishga qaror qilgan. U buni uyda, oddiy drel va boshqa mavjud vositalar yordamida o‘tkazgan.
Manbaga ko‘ra, erkak tushini boshqarish ilinjida implant-elektrod o‘rnatishga qaror qilgan. U yaqin kelajakda odamlar o‘z tushini nazorat qilishi mumkinligiga ishonadi.
“Uyqudagi miyani kuchaytirish bo‘yicha bir yarim yil tayyorgarlik ko‘rganman va bu asosiy maqsadim edi. Jinoiy xavf-xatarlar va boshqa ma’lum voqealar tufayli ushbu darajadagi tadqiqotlar uchun sezilarli istiqbollarni yo‘qotdim. Keyin o‘zim uchun yagona variantni tanladim”, — deydi Raduga.
U odamlarni bunday narsalarni takrorlamaslikka chaqiradi.
“Bu siz tasavvur qilganingizdan ham qiyinroq va xavfliroq. Operatsiyaning to‘rt soatlik videosi buni yaqqol ko‘rsatib turibdi. Men jarrohlik amaliyotida yetarlicha haqiqiy tajribaga ega emasdim, bu esa ko‘p qon yo‘qotishga va boshqa qiyinchiliklarga olib keldi”, — deydi u.
Erkak bir necha bor miya operatsiyasi bo‘yicha qo‘ylarda tajribalar o‘tkazgan. O‘zida olib borgan operatsiyadan besh hafta o‘tib shifokorlar uning bosh suyagidan chipni olib tashlagan. Oksford universiteti neyroxirurgi tajribani “o‘ta xavfli” deb atagan va infeksiya xavfi yuqori bo‘lishidan ogohlantirgan.
Izoh (0)