Birgina 2022-yilda Rossiyada 21 mingdan ortiq odam urushga qarshi pozitsiyasi uchun jazolandi. Bu haqda Amnesty International xalqaro inson huquqlari tashkilotining 20-iyul kuni chop etilgan yangi hisobotida aytiladi.
“Rossiyada norozi fikrlilarni bostirish keng tus olgan. Bir qator chora-tadbirlar Rossiya urushiga qarshi tanqidiy ovozlarni o‘chirishga qaratilgan”, — deydi huquq himoyachilari.
Hisobotda Rossiya hukumati Ukrainaga qarshi urushni qoralaganlarni qanday jazolashi tahlil qilingan, shuningdek, Rossiyada urushga qarshi harakatni bostirish uchun qo‘llanadigan qonunlar va amaliyotlar ko‘rib chiqilgan.
“Ushbu tizimdagi o‘ta adolatsiz jarayonlar qamoq va katta jarimalarga olib keladi”, — dedi Amnesty International tashkilotining Germaniyadagi bosh kotibi vazifasini bajaruvchi Yuliya Duxrov.
Tashkilot ma’lumotlariga ko‘ra, Rossiyada urushga qarshi pozitsiyasi uchun ta’qibga uchraganlarning aksariyati jarimaga tortilgan, ulardan 2 307 nafari hibsga olingan. Tadqiqotda aytilishicha, 150 dan ortiq odam “armiya haqidagi feyklar” va Rossiya Qurolli kuchlarini “takror obro‘sizlantirish” haqidagi moddalar bo‘yicha javobgarlikka tortilgan. Rossiyada qabul qilingan repressiv qonunlar mualliflar tomonidan “absurd” deb ataldi.
Bundan tashqari, Amnesty rossiyaliklar lagerlarga hukm qilingan holatlarni hujjatlashtirdi, tashkilot ularni siyosiy mahbuslar deb hisoblamoqda. Huquq faollari Rossiya hukumatini urushga qarshi pozitsiyasi uchun hibsga olinganlarning barchasini ozod qilishga va repressiv qonunlarni bekor qilishga chaqirdi.
Izoh (0)