Instagram ijtimoiy tarmog‘ida xonanda Kanizani haqorat qilib izohlar yozgan talaba yigit javobgarlikka tortildi. Bu haqda “Markaziy studiya” informatsion dasturida ma’lum qilindi.
Qayd etilishicha, jinoyat ishlari bo‘yicha Yakkasaroy tuman sudida Kanizani haqorat qilgan yigitga oid ish ko‘rib chiqilgan. Kanizaning so‘zlariga ko‘ra, ayblanuvchi bir necha oydan buyon uni Instagram sahifasi orqali turli so‘zlar bilan haqorat qilib kelgan.
Holat bo‘yicha esa tegishli organlarga qilingan murojaatlardan samara bo‘lmagan, xonandaning “Nega qonunlar ishlamayapti?” mazmunidagi videosidan so‘ng ayblanuvchi sudga jalb qilingan.
“‘Podpiska’ qilmaganman, stories’larini ko‘rganman. Tanimayman, ikki marta yozganman”, — deydi ayblanuvchi.
20 yoshli sudlanuvchi asli qashqadaryolik bo‘lib, hozirda Toshkent davlat texnika universiteti talabasi hisoblanadi. U sud majlisida qilgan ishiga iqrorligini va qattiq pushaymonligini bildirdi.
Sud qarori bilan ayblanuvchi Ma’muriy javobgarlik to‘g‘risidagi kodeksning 41-moddasi (haqorat qilish) bilan aybli deb topildi va unga BHMning 20 barobari (6,6 million so‘m) miqdorida jarima jazosi tayinlandi.
Fevral oxirlarida xonanda Kaniza ijtimoiy tarmoqlardagi axloqsiz videolari uchun litsenziyasidan bir oyga mahrum bo‘lgandi. Keyinroq u mazkur holatga munosabat bildirib, “O‘zbekkonsert”ni tanqid qilgan edi.
Izoh (0)