O‘zbekiston futbol assotsiatsiyasi bir qator soliqlardan ozod etiladi, deb xabar bermoqda Telegram’dagi “Huquqiy axborot” kanali.
Ma’lum qilinishicha, prezident tomonidan 18-iyul kuni imzolangan qonun bilan Soliq kodeksining 483-moddasiga qo‘shimcha kiritildi.
Shunga ko‘ra, 2026-yil 1-yanvargacha O‘zbekiston futbol assotsiatsiyasi, uning hududiy bo‘linmalari, “O‘zbekiston Professional futbol ligasi” jamoat birlashmasi, O‘zbekiston futbol hakamlari markazi va professional futbol klublari quyidagi soliqlarni to‘lashdan ozod etiladi:
- barcha turdagi soliqlari (bundan ijtimoiy soliq mustasno);
- o‘zi jalb qilgan chet el mutaxassislari va futbolchilarining daromadlaridan to‘lanadigan jismoniy shaxslardan olinadigan daromad solig‘i;
- O‘zbekistonga olib kiriladigan, O‘zbekistonda o‘xshashi ishlab chiqarilmaydigan sport asbob-uskunalari va inventari, translyatsiya qilish uchun zarur bo‘lgan asbob-uskunalar, inventar va texnika, farmakologiya tovarlari, sport oziq-ovqatlari, futbol (futzal) maydonlari uchun sun’iy o‘tlar, shokpad, granulalar, maxsus yelimlar va maxsus professional sport kiyim-boshlari, transport vositalari, shu jumladan maxsus transport vositalari uchun qo‘shilgan qiymat solig‘i.
Qonun rasmiy e’lon qilingan kundan e’tiboran kuchga kiradi.
Eslatib o‘tamiz, Shavkat Mirziyoyev 6-aprel kuni yoshlar siyosati va sportni rivojlantirish bo‘yicha takliflar taqdimoti bilan tanishganda O‘zbekiston futbolini rivojlantirish masalasiga alohida to‘xtalib o‘tilgandi.
2-iyul kuni Senatning qirq birinchi yalpi majlisida bugungi kunda iqtidorli yosh futbolchilarni saralab olish tizimi va futbol infratuzilmasini yanada rivojlantirish, sohada marketing va zamonaviy boshqaruv mexanizmlaridan samarali foydalanish maqsadida amaldagi soliq imtiyozlarining amal qilish muddatini uzaytirish zarurati mavjudligi qayd etilgandi.
Izoh (0)