Qozog‘iston sobiq generali Serik Kudebayev mamlakatdan qochib ketgani uchun sudlandi. Bu haqda Tengrinews xabar berdi.
Olmaota viloyati Kegenskiy tuman sudida Kudebayevning mamlakatdan qochish ishi ko‘rib chiqildi. Sobiq general masofadan turib sud qilindi.
Sud qarori bilan Serik Kudebaev 392-modda “Qozog‘iston Respublikasi davlat chegarasini qasddan noqonuniy kesib o‘tish” bo‘yicha aybdor deb topildi. U olti oylik qamoq jazosiga hukm qilindi.
“Jinoyat kodeksining 392-moddasi 1-qismida nazarda tutilgan jinoyatni sodir etganlikda aybdor deb topilib, olti oy muddatga qamoq jazosi tayinlansin. Jinoyat kodeksining 58-moddasi 3 va 6-qismlariga asosan va huquqbuzarliklar soni bo‘yicha Jetisu viloyati Taldiqo‘rg‘on sudining 2023-yil 28-apreldagi hukmi bilan tayinlangan jazoning qisman qo‘shilganini hisobga olgan holda, Kudebaevga nihoyat 10 yil-u 3 oyga ozodlikdan mahrum etish belgilansin. U jazoni o‘rtacha xavfsizlik tizimidagi jazoni ijro etish muassasasida o‘taydi”, — dedi sudya Asem Yelemes.
Jazoning jami va qisman qo‘shilishi bilan Kudebayev hibsga olingan paytdan boshlab vaqtincha saqlash hibsxonasida o‘tkazgan muddati hisobga olinsa, generalning umumiy qamoq muddati 10 yil-u 3 oyni tashkil etdi.
Shuningdek, u 10 yilga davlat organlarida lavozim egallash huquqidan mahrum etildi.
1-aprel kuni OAVda sobiq general Kudebayev xorijga qochib ketgani haqida xabar berildi. U Qirg‘iziston bilan chegarani kesib o‘tib, u yerdan O‘zbekistonga, so‘ngra charter bilan Shimoliy Kiprga uchishi mumkin edi. Jetisu sudi Olmaota viloyati politsiyasining sobiq rahbarini xalqaro qidiruvga berdi.
Ma’lum bo‘lishicha, 23-mart kuni Kudebayev davlat chegarasini kesib o‘tgan va Bishkekdagi Manas aeroportidan Istanbulga uchgan. Kudebayev o‘sha paytda yanvar voqealari bo‘yicha gumonlanuvchi edi.
27-aprel kuni bosh prokuror Berik Asilov general-mayor Turkiyada qo‘lga olingani va Qozog‘istonga olib ketilgani haqidagi ma’lumotni tasdiqladi. Keyinroq Kudebayev vaqtinchalik saqlash hibsxonasiga joylashtirildi.
Sobiq general Jetisu viloyati sudi tomonidan aybdor deb topildi va 10 yilga ozodlikdan mahrum qilindi va o‘rtacha xavfsizlik muassasasida jazo o‘tashga hukm qilindi.
Izoh (0)